نوشت: کوہ دل بلوچ
"نی دا خن تِہ کشنک کروس ہرا خنک راجی آجوئی نا تغ ئے خنانو او خن تِہ کشنگ کپروس”
کڑدار ئسے لکھنگ کاٹم ئے دیوال ئٹ خلنگ آن سختو کاریم ئس ءِ۔ ملی گیر کپک اخہ در بھلو لوز و خیال شاخس، دا اسہ لس بندغ ئسے نا وس آن پیشنو ہیت ئس ءِ۔ دا نوشت آن است جم تو مفک ولے خوئش مرے ہم گنج ئس ءِ۔
دا گواچنی ئس ءِ کہ کڑدار ئس مننگ کن بندغ ئے تینا زات، رضا، اُست خواہی و داکان بیدس تینا زات ئتون گنڈوکا ہر گڑا ئے ندر کروئی تمک۔ گڑا او کڑدار تیناعمل، سگ،حوصلہ، جیرت و دلیری نا بِج ئے دسک و پد ئنا ردوکا ہر پھل ہمونا ڈھیک ئے ایتک۔ تینا مسخت و مزل ئے مارِسہ۔ تینا چپ و چاگڑد آن سرپند، بزگی،لنگڑی شپادی و بے وسی نا دڑد ئے جوان وڑ ئٹ پُہہ مریک۔ خلق، خاہوت، اُرا، چنا، مراد ئہ خوئشی و اُست خواہی نا گڑتی تا زمزیر ئے کشکک تینے پاک و پلگار کیک۔ تیدار آ لگوکا غلامی نا لپ آ تِہ تینا دتر ئٹ سلک۔ دژمن نا مونا بے وسی و بزگی نا مودہ کپک، تینا ہر خیسن آ سُم ئٹ دژمن نا ملی ٹی تینا آجوئی نا پڑو ئے کیک۔گڑا دا کڑدار ئے ڈغار خمب بغل کیک سینہ ئے تینا پھدین کیک جارات ئٹ شاد و گل مریک۔ دا جہد ئے سوگو و بِسُن کننگ کن گڑا دا کڑدار تا دتر نا ہر اسہ پڑی شہتیر نا کاریم ئے کیک۔ گوریچ و ہورہ، ٹاک آہڑ نا تہوش، مش تِہ خید ئٹ سلنگ، نَت تا تلف ئے کپ کپ کننگ، بے تغ آ خن تا خیسنی بیرہ ہیت ئٹ اڑزان مننگ کیک ولے گواچن ئٹ تلار نا وڑو سینہ خواہک۔ جنگ ئنا پِڑ سگ و مش آنبارو جغر خواہک۔ ہیت چِھوہ کہ ننگ و ڈغار آ برے گڑا بھیم ئے کھڈ کرسہ خاک ئنا خواجہ ئس خل تِہ سڑجہ کیک۔ اینو تینا نزوری تا جاچِ ہلسہ ہر ورنا ئے تینا کڑز و فڑز ئے پورو کننگ نا گرج ءِ۔
زلم و زوراکی نا تہوش ئٹ ہشنگوکا راج و ڈیہہ ئکن پھدینو سہب ئسے نا سوچ آصف نا وڑو مڷ ئس ودی کیک۔ منگچر نا خاک بے مٹّو کڑدار تینا خمب ئٹ کرینے۔ شہید آتا دتر تِہ زرس گیشتر خیسن کرسہ شہید آصف ہم چنک ئس دتر گٹ آن ایتک۔ شہید آصف تینا بنداوی تعلیم ئے شال آن ہلیک۔ اوڑان گڈ مستی خواننگ کن لاہور آ کائک۔ ولے اندن کہ او غلامی ئے او ڈیہہ ئنا نت شپادی ئے محسوس کرے گڑا چُپ و بے تواری ئٹ مش تیا مون کرے۔ او ۲۰۲۳ نا اول اٹ گڈی سُم ئنا فلسفہ غا عمل کرسہ جند ندری نا گچین انگا فیصلہ ئے کرے۔ ۱۹ اگست آ ماران نا مش تیا دژمن تون جلہو ئسے آ تینا سنگت شہید محمد بخش تون شہید مس۔ آصف اسہ پر جوش، تکڑہ، خواری کش، سادہ تب، ہنر آن پُھر، شہور نا دنگ و سیم آن ایسر، مزہ جغر، مہر ئنا مش ئس اسک۔ اندا شہور و ہنر مندی نا سوب آن آصف دا خاک ئنا است و روح ئنا ہسونی تِہ ہم پُہہ مسکہ و تینا دتر تیان خاک ئنا ہر جُر و نُر آ ٹپ ئے درمان کننگ خواہسکہ۔ دتر نا ہر پڑی آن دا کسر نا بے سد و گم مروکا کہ چیدہ تخا۔ پالن آ دتر تیان بارن آ فکر و سوچ تِہ نمب کرے۔ آصف تینا بِسُن آ جوزہ و پکّو آ فکر ئے عمل نا پوشاخ بیرفسہ عملی پِڑ آ دھڑا، گڑا دا اسہ کلہو ئس ءِ کہ ڈغار نا دڑد آک فکر و پام کننگ خوارہ۔ ہیت لمہ ایڑ ئنا چادر آ برے گڑا ارا نا تولنگ بندغ نا سو و ملی ئے چونڈسہ کیک۔ اندا گڑتی اسہ بندغ ئسے شان و شرف بشخسہ راجی جنز ئنا سیم آ سر کیک و کاٹم ئے تلف آ تخفک۔ ہر شہید ئے کاٹم ئے شیف کرسا خیسنو سلام کینہ۔
