کیچ: 16 دسمبر 2024 آ جہی چئیرمین ہوتمان نا دو آن زوراکی۔ ئٹ بیگواہ کننگوک ورنا زمان جان ءِ سپاہان و عبدالحسن ءِ رحمت نا خاہوت ہوشاپ ئٹی سی پیک کسرئے برانز کرسا بند کرینو۔
تولوک برانز ئٹی خاہوت تون اوار جہی مخلوق بھلو کچ ئسیٹی بشخ ہلکنے۔ کسر نا بند مننگ نا سوب آن ہڑتُما پارہ غان اُلاخ آک سلیسنو۔
خاہوت نا پاننگ ءِ کہ زمان جان و عبدالحسن تون اوار ننا خاہوت نا الطاف پنیئو ورناس ئے خواہفنگاسس و پدا ریاستی ادارہ غا تا دوٹی تننگاسس۔ الطاف ولدا یلہ کننگا ولے زمان جان و عبدالحسن دائسکان بیگواہ ءُ۔
اوفک خواست کرینو کہ سرکار ننا چُنا تا آجوئی کن گھام ہرفِہ و ننا چُناتِہ زوت آجو کننگ مرے۔ ایسکان زمان جان و عبدالحسن آجو کننگ متنو نن تینا برانز ئے برجاء تخون۔
خیال ئٹ مرے، زمان جان و عبدالحسن نا زور بیگواہی نا برخلاف خاہوت 20 دسمبر آ پریس کانفرنس ہم کریسس و مُسہ دے ئنا وخت تسس۔ مُسہ دے ئنا وخت کُھٹنگ آن پد خاہوت اینو برانز کرسا سی پیک کسرئے بند کرینے۔
