بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ 20 دسمبر آ کولواہ نا علاقہ رودکان ئٹی قطر آن بروکا شیخ آتِہ رکھوکا پاکستانی لشکر آ سرمچارک جلہو کریر۔ ہمر کہ بلوچ و پاکستان نا نیام ئٹی جنگی چک ئہ تاڑ ودنگ ئٹی ءِ، تو پاکستان ہمسایہ ڈیہہ تا مہمان تِہ جنگ زدہ و کوزہ کروک بلوچستان آ اترِسہ بلوچ قوم و اونا ہمسایہ قوم آتا نیام ئٹی بدگمانی و تلخی ودی کننگ نا کوشست کننگ ءِ۔ دنیا چائک کہ تدوکا اِرا دہک آن ننا پاکستانی لشکر تون مون پہ مون جنگ برجاء ءِ۔
او پارے کہ بلوچستان لبریشن فرنٹ دا ڈیہہ تا مہمان تیان خواست کیک کہ او دمدستی جنگ زدہ بلوچستان ئٹ تینا شکار نا پروگرام تِہ ایسر کیر، سفر و شکار کننگ آن مُر مریر۔
اونا پاننگ اس کہ قابل فخر و مہمان توروک بندغ آتا حیثیت ئٹ بلوچ قوم ساندہ ہمسایہ ڈیہہ تیان بروکا بندغ آتِہ بخیر کرینے۔ ولے ساڑی آ جنگی حالیت ئٹ، ننا مہمان تا پاکستانی لشکر تون ہچ وڑ ئنا کاریم تیٹ اوار مننگ آن مُست زمینی گواچن آتیان سرپند مننگ نا گرج ءِ۔ داڑان نہ بیرہ اوفتا رکھ خطرہ ٹی ءِ، بلکہ او تینا عمل کن ذمہ وار مننگ نا خطرہ تون ہم مون ایترہ۔
ترجمان پارے کہ بی ایل ایف بلوچ اُلس ئنا پارہ غان خلیجی ڈیہہ، خاصیکا عمان و قطر نا راہشون تیا زور تیک کہ او تینا شاری تا رکھ ئے کیر۔ اندن کہ چک ئہ تاڑ ودنگ ءِ، ہمسایہ ڈیہہ تیکن المی ءِ کہ او بلوچستان نا جند خواجہی (خودمختاری) و قومی آجوئی نا جنگ ئنا احترام ئے کیر و برجاء غا جنگ ئٹی ہچ وڑ ئنا دو شاغپس۔
میجر گہرام پارے کہ ننا کلہو پھاش ءِ کہ بلوچستان حالت جنگ ئٹی ءِ و دا وخت آ سیل کن بروکا بندغ آتیکن رکھوک اف۔ نن تینا مہمان تیان خواست کینہ کہ او دا ہیت ئنا شرف ئے تخر و پاکستانی لشکر و ایلو سکیورٹی لشکر آتون جنگی علاقہ غا تیٹی بفس۔ بلوچستان ئٹی ہر وڑ ئنا سفر کننگ نا ارادہ کننگ آن مُست زمینی حالیت او شیفی بڑزی تیان پُہہ مریر۔
اندن اونا ودیک پاننگ اس کہ بلوچستان لبریشن فرنٹ بلوچ قوم ئنا قومی آجوئی، اُلس ئنا بنداوی حق و بنداوی بندغی آجوئی نا دفاع کن پُرعزم ءِ۔ تدوکا اِرا دہک ئٹی ننا دلیر آ سرمچارک تینا سرزمین و تینا بندغ آتا رکھنگ کن برجاء پاکستانی لشکر نا برخلاف خواری کش جنگ و جہد کننگ ءُ۔
او پارے کہ نن تینا مہمان تِہ نادانستہ وڑ ئٹ دا جنگ ئٹی کارمرز مننگ و نسخان نا کسر ئٹ شاغنگ نا موکل تفرون۔
اونا پاننگ اس کہ بھاز شرف ئٹ نن قطر و عمان نا راہشون تیان خواست کینہ کہ او بلوچ قوم و عرب قوم ئنا نیام ئٹی دود ربیدئی او دیہاڑی سیالی ئے سرپند مریر و تینا شاری تِہ کوزہ مروک بلوچستان ئٹی شکار کننگ یا سفر آن تورِر۔
میجر گہرام پارے کہ بلوچستان لبریشن فرنٹ ہمسائہ ڈیہہ تا راہشون تیان خواست کیک کہ او جنگ ئنا دا وخت آ بلوچستان آ بفس۔ دا اسہ علاماتی جلہو ئس اس ہرا بیرہ رکھ کروک اُلاخ آتیا کننگا، مہمان تِہ رضا ئٹ ہچ نسخان تننگتو۔ بلوچستان حالت جنگ ئٹی ءِ و ہمسایہ ڈیہہ تا معزز شاریک بلوچستان ئٹی سفر و شکار کننگ آن تینے مُر تورر۔ تاکہ بلوچ سرمچار و پاکستان نا دہشت گرد آرمی نا نیام ئٹی ہچو جھڑپ ئسے آن شاری تِہ نسخان مف و ایلمی آ تعلقداریک خراب مفس۔
او ایسر ئٹ پارے کہ بلوچستان لبریشن فرنٹ خطہ ٹی ایمنی ئہ سلامتی و بلوچستان نا آجوئی، ایمنی و چائنگ و چائند تننگ کن خلیجی ڈیہہ تتون اوار کاریم کننگ نا خواست کیک و ساڑی آ حالیت آن ویتہ ایلمی نا سیالی ئے سوگو کننگ نا عزم کیک۔
