
بلوچستان نا ضلع کیچ ئنا بنجائی شار تربت و گوادر آن پاکستانی لشکر پنچ بندغ دزگیر کرسا بیگواہ کرینے ہرافتان اسٹ ئس پدان آجو مسنے، و چھار دائسکان بیگواہ ءُ۔
زوراکی ئٹ بیگواہی نا گواچی کننگوک بندغ آتا چاہنداری، ناصر نا مار شاہ، شیر محمد نا مار عرفان، سپاھان نا مار زمان، عبدالحسین رحمت، و الطاف بہرام نا پن ئٹ مسنے۔
بیگواہ کننگوک آتا بارو ئٹ پاننگِک کہ 16 دسمبر 2024 آ پاکستانی لشکر تربت آن زمان صفیان، عبدالحسین رحمت و الطاف بہرام ئے دزگیر کرینے، پدا الطاف بہرام ئے آجو کننگا ولے زمان صفیان و عبدالحسین رحمت دائسکان بیگواہ ءُ۔
ایلو بیگواہ کننگوک آ تیان عرفان ئے دوانزدہ دسمبر آ پاکستانی لشکر تربت سلالہ بازار آن دزگیر کریسس، و داد شاہ ئے درو شام ئنا دریابی شار گوادر آن دزگیر کننگانے۔
یاتی مرے کہ زمان ولد سپاھان ہرا کیچ ئنا جہہ بالگتر نا جہی ئس ءِ، دا اولی وار اف کہ زمان ئے زوراکی ئٹ بیگواہ کننگانے بلکن داکان مُست زمان بلوچ و اونا ایلم ماجد بلوچ ئے 9 جون 2020 آ زوراکی ئٹ بیگواہ کننگاسس، اوفتِہ شش تو بھاز بیدادی نا گواچی کننگ آن پد آجو کننگا۔
داکان بیدس اوفتِہ 10 فروری 2022 آ ہم تربت بازار آن زوراکی ئٹ بیگواہ کننگا۔ داسہ مسٹمیکو وار ولدا دزگیر کننگانے۔