بلوچ رہشون و بی این ایم نا مُسکوہی چئیرمین خلیل بلوچ میڈیا غا لُمہ ءِ وطن شہید بانک کریمہ نا سال دے ئنا وختا پارے کہ اینو نن تینا راج ئنا دلیر آ مسڑ بانک کریمہ نا شہیدی نا سال دے آ اودے یات کننگ اُن، ہرا تینا زندگی ئے بلوچ راج ئنا آجوئی و ٹیوار کن ندر کرے۔ او نہ بیرہ بی ایس او نا اولی زالبول سروک اسک بلکہ ہندنو راہشون ئس اسک ہرا تینا جیرت، چائند و عزم ئٹ دیہاڑ ئٹی تین کن جہہ ئس جوڑا۔
او مُستی پارے کہ راجی سیاست بانک کریمہ نا کڑدار ئے مُدام یات کرو۔ اینو نن تحریک ئٹی ہر کنڈ آن گیشی خننگ اُن خاصیکا زالبول و ورنا تیٹی۔ دا ٹی بانک کریمہ نا بھلو کڑد ئس ءِ۔ او ہر کوچہ و خلق ئٹی موبلائزیشن نا عمل ئے مونی درے و تحریک ئے اسہ پوسکنو تاغت ئس تس۔
او ودیک پارے کہ کینڈا ٹی جلاوطنی نا وختا ہم بانک کریمہ تینا جہد ئے برجاء تخا۔ اونا بے باکی و حوصلہ دشمن تون برداشت کننگ متوکہ۔ چھار سال مُست نن تینا اسہ سنگت و رہشون ئسے آن زبہر کننگان ولے بلوچ راج مُدام اونا جہہ، مرتبہ و عزم ئے یات تخو۔
