بی ایل ایف نا جارکش میجر گہرام بلوچ میڈیا ٹی شنگ کروکو تینا درشان ئسے ٹی پارے کہ سرمچارک بیست دسمبر نا سہب ئنا خاران نا ہند سرخاران ئٹی ہرو نا ٹک آ کوزہ گیر پاکستانی لشکر نا قافلہ ئے پوسکن و بھلا سلاہ تیٹ جلہو کریر، جلہو ئٹی کوزہ گیر نا اسہ افسر ئسے تون اوار نُہہ کارندہ خلنگا و میجر تون کیہی کارندہ ٹپی مس۔
اونا پاننگ اسک کہ پاکستانی لشکر نا دا قافلہ دہ اُلاخ آتیا ساڑی اس ہرا شام ئنا ہُرے آ ہند ئٹی لشکر کشی کن پیہاسُر و سرمچار تِہ گھیرہ کننگ نا کوشست کریر ولے بی ایل ایف نا انٹیلیجنس ونگ ئنا حوال رسینگ تون مُست تیار مسوسُر۔
او پارے کہ وختس لشکری کارندہ غاک سرمچار تِہ گھیرہ کننگ نا کوشست کریر گُڑا اسہ جنگ ئس بناء مس ہرا چھل و پنچ منٹ آن گیش برجاء مس، دا جنگ ئٹی دشمن لشکر نا افسر تون اوار نُہہ کارندہ خلنگا و میجر تون اوار کیہی لشکری کارندہ غاک ٹپی مسُر۔ جلہو آن پد پاکستانی لشکر نا ہیلی کاپٹر آک ہم سر مسر و تینا خلنگ و ٹپی مروکا کارندہ غا تہِ کوئٹہ غا درے۔
میجر گہرام بلوچ پارے کہ سرسوب آ دا جلہو آن پد سرمچارک سر سلامتی ئٹ گھیرہ ئے پرغسہ رکھکوک ٹھکانہ غا تیا ہنار۔
او پارے کہ بی ایل ایف راجی لشکر ئس ءِ ہرانا سرسوبی نا بنجاہ بلوچ الس ءِ و ہندن السی مختفی نا سوب آن بی ایل ایف بلوچستان نا ہر شار و خلق ئسکان منظم و متحرک ءِ۔
او دیک پارے کہ پوسکنا جنگی حکمت عملی، پوسکنا تنظیمی ہاٹی بی ایل ایف ئے پوسکنا تقاضہ غا تا رد ئٹ ہم آہنگ کرینے ہرانا سوب آن بلوچستان نا ہر جاگہ غا لشکرئے سخت جلہو تون مون تروئی تمنگ ءِ و دا جلہو تا سوب آن پاکستانی لشکر بلوچستان ئٹی سخت نفسیاتی دباؤ نا گواچی ءِ ہرا ثابت کیک کہ زوت یا ہُرے آ پاکستانی لشکرئے دا زمین آن پیش تمنگ کن بیوس کرون۔
او ایسر ئٹ پارے کہ بلوچستان لبریشن فرنٹ دا جلہو نا زمہ واری ئے ہرفک و آجو بلوچستان ئسکان کوزہ گیر لشکر ئے ٹک کرسا کرو۔
