بلوچستان نا ضلع خاران آن حوال ءِ کہ پاکستانی لشکر اُرا تیا چھاپہ خلِسہ کیہی بندغ آتِہ دزگیر کرسا بیگواہ کرینے۔
پاکستانی لشکر نا دو آن بیگواہ کننگوک اِرا بندغ نا چاہنداری رحیم الدین ولد حاجی خدانظر سیاہ پاد و حافظ محی الدین سیاہ پاد نا پن تیٹ مسنے و ایلو بندغ آتا چاہنداری متنے دائسکان۔
ہژدہ اکتوبر آ پاکستانی لشکر کیچ ئنا ہند ہوت آباد ئٹی اُرا تیا چھاپہ خلِسہ اوڑے ساڑی بندغ آتِہ بیدادی نا گواچی کرے و اسہ ورنا ئسے دزگیر کرے۔
دزگیر مروکا ورنا نا چاہنداری بالاچ ولد حاصل بلوچ نا پن ئٹ مسنے، اودے دزگیری آن پد مونی ہتنگ متنے۔
بلوچ یکجہتی کمیٹی کیچ ورنا نا پاکستانی لشکر نا دو آن زور بیگواہی نا حوال ئے پک کرینے۔
ایلو پارہ غان ہندا سال 10 نومبر آ دشت کھڈان ئٹی پاکستانی لشکر کاروائی کرسا کیہی بندغ آتِہ دزگیر کریسس۔ اوفتیٹی اسٹ ئس طلال ولد عمر اینو سہب ئنا آجو مرسا اُرا غا سر مس۔
ہندن اسہ پین ورناس نیاز ولد دلمراد ہرادے اِرا تو مُست 16 اکتوبر آ نیول کالونی آن سلاہ بند بندغ آک دزگیر کریسُر، استو شام ئنا 18 دسمبر آ آجو مسس۔
