تربت آن زوراکی ئٹ بیگواہ کننگوک ورنا تا خاہوت تربت پریس کلب ئٹی پریس کانفرنس کرسا پارینے کہ ننا خاہوت نا مُسہ بندغ، زمان بلوچ، عبدالحسن، اور الطاف ئے ضلع کونسل کیچ ئنا چیئرمین اِرا دے مُست ریاستی ادارہ غا تا دوٹی تسنے ہرافتان الطاف ئے درو ننکان یلہ کننگانے ولے زمان جان و عبدالحسن نا دائسکان ہچ حوال اف و ننے اوفتا بارو ئٹ ہچو حوال تننگ متنے و نن اوفتا سلامتی کن فریشان اُن۔
او پاریر کہ نن خواست کینہ کہ ننا خاہوت نا بندغ آتِہ زوت یلہ کننگِہ اگہ اوفتا دوبہ ارے تو اوفتِہ عدالت ئٹ ہتنگ مرے۔ ننتو مروکا بندغی حق آتا لتاڑ نا حساب ہلنگ مرے انتئے کہ ننا خاہوت اسہ وڑ زوراکی نا بیگواہی، بیم تننگ، دڑکو و دروغ ئنا دوبہ آتون مون تننگ ءِ و عدالت و بندغی حق آتا تنظیم آتیان خواست کینہ کہ او ننا خاہوت نا بندغ آتِہ رکھ ایتر، بین و دڑکو تِہ ایسر کیر ہراتم ضلع چیئرمین میر ہوتمان و ایلو ایجنٹ آتا دا گھام تا پٹ ئہ پول ئے کیر۔
اوفتا پاننگ اس کہ اگہ ننا خواست مُسہ دے ئٹی پورو متو تو نن برانز کننگ آ بیوس مرون۔ نن جتا جہہ تیا تولوک برانز کرون و اہم انگا کسر تِہ بند کرون۔
او ودیک پاریر کہ نن بندغی حق آتا تنظیم و سیاسی تپہ آتیان خواست کینہ کہ و دا جہد ئٹی ننتو اوار مریر۔ عدالت آک ننا کیس ئنا نوٹس ہلیر و انصاف تننگ تا باور ایتر و بڑزکو کوالخواک دا ویل ئٹ دو شاغر و ننا خاہوت نا بندغ آتِہ ودیک نسخان آن رکھیر۔ نن اومیت کینہ کہ نُم ننا خواست ئے سوبری ئٹ ہرورے و ننا ویل آتا ایسری کن دمدستی کن گھام ہرفر۔
اوفتا پاننگ اس کہ نن اسہ وڑ برجاء غا دا روشت نا منفی زہم ئٹی نفسیاتی دباؤ، ذہنی دمدرینگ، پی ٹی ایس ڈی و ایلو وڑ ئنا نسخان تا گواچی اُن۔ زوراکی نا بیگواہی اسہ ڈوہ ئس ءِ، و اسہ بندغ ئسے وار واع آ زوراکی ئٹ بیگواہ کننگ نا مسخت اودے نفسیاتی حساب آ تباہ کننگ مریک۔ ننا خاہوت نا کیہی بندغ زوراکی ئٹ بیگواہ کننگانو ہرافتان منٹ ئس آجو مسنو ولے او جتا جسمانی و نفسیاتی ویل آتا گواچی ءُ، و اسٹ تینا ساہ ئے تینٹ ہلک۔ ننا خاہوت نا اسہ بندغ، چاکر مجید، ئے اِرا وار زوراکی ئٹ بیگواہ کننگا ہراکان گڈ او نفسیاتی ناجوڑی تا گواچی مس و تینا ساہ ئے ہلک۔
اندون زمان بلوچ ارٹمی وار زوراکی ئٹ بیگواہ مسُنے۔ عبدالحسن تون دا مُسٹمی رند ءِ۔ اودے اونا سالم و الہّ نا مار الطاف تون اوار بیگواہ کننگانے۔
اوفک پاریر کہ دا وار نا بیگواہ کننگ پین وڑ ئٹ مسُنے۔ ڈسٹرک کونسل کیچ ئنا چیئرمین اوفتہ خواہفِسہ سرکاری ادارہ غا تا دُوٹی تِسنے و خاہوت ئے نفسیاتی دباؤ نا گواچی کرینے۔ نن تینا خاہوت تون مروک نفسیاتی ہراسانی نا برخلاف آ آئینی جنگ مِڑون و دا ڈوہ ئٹی اوار کُل بندغ آتا برخلاف عدالت آ ہنون۔
اوفک پاریر کہ مُسہ دے مُست ننا خاہوت نا مُسہ بندغ سپاہان نا مار زمان، بہرام نا مار الطاف و رحمت نا مار عبدالحسن ئے ضلع چیئرمین تُربَت دوازدہ گھنٹہ تورنگ آن پد اوفتہ ریاستی ادارہ غا تا حوالہ کرے۔
نن ضلع چیئرمین نا پارہ غان خلوک بے بنیاد آ دوبہ تِہ رد کینہ و تینا بندغ آتا آجوئی کن آئینی و قانودی جہد ئنا پِڑو کینہ۔ ضلع چیئرمین تُربَت ننا خاہوت نا نرینہ غا تِہ زوراکی ئٹ بیگواہ کننگ ئٹ تُد ءِ ۔ او وار وار آ تِڑی تننگ ءِ و بیم تننگ ءِ۔
اوفک پاریر کہ ننا خاہوت نا بندغ آتا زند خطرہ ٹی ءِ۔ نن وار وار ئنا ظلم، بیم و زور ئنا بیگواہی آن دمدرینگانُن۔ ولے داسہ نن چُپ مروفن۔ نن بندغی حق آتا تنظیم، عدالت، و بڑزکو کوالخواہ تیان خواست کینہ کہ زمان بلوچ و عبدالحسن نا آجوئی کن ننا آئینی جہد ئٹ ننتون تُد مریر۔
