شال بلوچ نیشنل موومنٹ بی این ایم نا مسکوہی سیکٹری جنرل و بی ایس او نا مسکوہی چئیرمین رحیم بلوچ ایڈووکیٹ تینا شنگ کروک بیان ئٹی پارینے کہ آجوئی خواہوک بلوچ راہشون واحد بخش عرف واحد قمبر بلوچ ئے پاکستان نا انٹیلی جنس ایجنٹ آتا دو آن بیگواہ مروک 5 تُو گدرینگانے، و دائسکان اودے ہچو مجاز عدالت ئسیٹی ہتنگ متنے۔
او پارے کہ پاکستان نا فوج، پولیس و ایلو سیکیورٹی سروس آتا کنڈ آن کوزہ مروک بلوچستان ئٹی زوراکی نا بیگواہی، بیدادی، بیدس عدالت کھسفنگ و ایلو چم بازی تِہ کاریم ئٹ ہتنگ خطہ ٹی پاکستان نا ریاست نا بےشرفی ئے پھاش کیک۔ قانود نا حکمرانی و انصاف آن ویتہ ریاست نا ہچو تصور ئس مفک۔
او پارے کہ زوراکی نا بیگواہیک بندغی (انسانیت) نا برخلاف ڈوہ ئسے ءُ ولے پاکستان دا ڈوہ ئے کیہی دہک آن کوزہ مروک بلوچستان ئٹی تینا سیکیورٹی پالیسی تا کلیدی سلاہ نا وڑ کاریم ئٹ ہتنگ ئٹی ءِ۔
ہڑتُما دروشم ئٹ، چائے پاکستان نا پارلیمنٹ، حکومت و عدلیہ فوج آ تاغت مفننگ نا سوب آن یا فوج و سیکورٹی نا ادارہ غا تتون اوڑدئی ئٹ چم بازی نا سوب آن زوراکی نا بیگواہی تِہ توننگ کپسہ۔ دا اسہ اندنو گواچن ئسے نا پیدواری ئے کیک ہرا اسل رد کننگ مفک کہ پاکستان اسہ بدمعاش ریاست ئس ءِ و داڑان کوزہ مروک بلوچستان ئٹی بندغی نا برخلاف ڈوہداری تیا ورندی ہلنگ بکار ءِ۔
