بلوچستان نیشنل موومنٹ نا مسکوہی چیئرمین خلیل بلوچ پاکستانی لشکر نا دو آن زوراکی ئٹ بیگواہی نا گواچی استاد واحد کمبر نا حوالہ ئٹ چاگڑدی حوالکاری تلہ ایکس آ تینا اسہ پوسٹ ئسیٹ پارینے کہ ننا بزرگ استاد واحد کمبر تینا زند ئے اصول پسندی، جہد و راجی آجوئی کن تس۔
او نن کن اسہ کسر نشان تروکو چراغ ئس ءِ۔ اونا بصیرت و قربانی بلوچ تحریک ئے اسہ بنیات ئس تننگ ء۔ استاد ہمو شخصیت ءِ ہراڑا نن فخر کینہ۔ اونا جہد دا گواچن نا گواہی ءِ کہ ظلم، جبر و استحصال نا برخلاف بش مننگ کن ہچ وخت کاٹم شیف کننگ کپک۔
او پارے کہ پاکستان ئے یات تخنگ مرے کہ استاد واحد کمبر نا وڑو راہشون و اوڑتون اوار ہر بلوچ تینا جہد ئٹ اسہ کلہو ئس تسنے کہ جبر ئنا برخلاف بلوچ ہچ وخت چپ مفرو۔ نما ظلم ننا تاغت ءِ، نما جبر ننا مزاحمت ئے پین ودیفک۔
اونا پاننگ اسک کہ استاد واحد کمبر بلوچ راجی تحریک نا کماش سپاہی ئس ءِ۔ پاکستان کن ننا موقف ساف ءِ کہ استاد واحد کمبر نا جہد اسہ السی توار ئس ءِ، ہرادے نم توننگ کن لکھ کوشست کبو، دا پین بڑز مرِسہ کرو۔ بلوچ راج تینا راجی آجوئی کن ہچو قربانی ئسے آن پد مفرو۔
خلیل بلوچ پارے کہ کماش استاد نا مسنک راج ئنا مسنک ءُ، و راج تینا مسن تا دا جنگ ئٹ ہر محاذ آ اوفتتون اوار مرو۔
