زور ئٹ بیگواہ کننگوک بندغ آتا آجوئی کن وی بی ایم پی نا برانزی گدان ئے 5672 دے مس۔
وائس فار بلوچ مسنگ پرسنز نا گدان آ اینو سیاسی و چاگڑدی جہدکار سجاد احمد، عبدالحکیم و شیر محمد بسّر اواری نا درشانی کریر، او پاریر کہ بلوچستان ئٹی بیگواہی تا ویل ایسر مننگ نا جہا ہڑدے گیشتر مننگ ئٹی ءِ، ہراڑان بلوچ چاگڑد اسہ کُنڈ آن دڑد ئسے ٹی ءِ تو ایلو پارہ غان بھلو خار ئسے آن گدرینگک۔
دا وخت آ وی بی ایم پی نا وائس چیئرمین ماما قدیر بلوچ تران کرسہ پارے کہ بلوچستان اسہ جنگ زدہ ءُ ڈیہہ ئس جوڑ کننگانے ہراڑے زوراکی زیات مننگ ئٹی ءِ، محکوم آتا جون تہ خسّنگک و پیرنگاک تینا ورنا تا میت آتہ کوپہ تنّنگ ئٹی ءُ۔
او پارے کہ دا سال ئنا دے ہم بلوچستان ئٹی لشکر کشی تون اوار کیہلینگک۔ اینخو بھلو مخلوق ئس زورئٹ بیگواہ کننگانے ہرافتیٹ نیاڑی ہم ارے۔ لشکرکشی تیان لگّک کہ بروکا سال پین دتر چُر مرو۔
ماما قدیر بلوچ پارے کہ بلوچستان ئٹی ہزار آ بندغ آتا زورئٹ بیگواہی بندغی تاریخ ئٹی بھلو دڑد ئس ءِ، و پاکستانی ریاست نا دا چم کیہی سال آن برجاء ءِ۔ پاکستان نا حاکم آک بدل مسّر، حکومت آک بھاز آ جماعت و زوراک آتہ رسینگار ولے بلوچ نا بارث ئٹ ریاست تینا ڈٹ بندی ٹی ہچّو بدلی ئس ہتپک۔
او خْواست کرے کہ امن کن لازم ءِ کہ زورئٹ بیگواہی تا چرجوئی بند کننگہ و زورئٹ بیگواہ کننگوک بندغ آتہ یلہ کننگِہ۔ بلوچستان آن پُھلوکا بندغی حق آتہ بحال کرسہ مخلوق ئے جارات ئٹ الّینِگہ۔
