بلوچ نیشنل موومنٹ (بی این ایم) نا بندغی حق آتا شعبہ، پانک نومبر 2024 ئٹی بلوچستان ئٹی بندغی حق آتا لتاڑ آ تینا رپورٹ ئے شنگ کرینے۔ رپورٹ ئٹی کراچی و بلوچستان نا پانزدہ ضلع ٹی 98 زوراکی نا بیگواہی و 12 بندغ بےقانودی کھسفنگ نا پیدواری کننگانے۔ بیرہ کیچ ئٹی 31 بندغ زورئٹ بیگواہ کننگانو، ہرا ایلو علاقہ آتیان زیات ءُ۔
رپورٹ نا رد ئٹ پاکستانی لشکر و اونا بدنام کمکارک "آپریشن سائیلنس” نا رد ئٹ خلّنگ بِٹنگ نا حکمت عملی آ کاریم کننگ ءُ۔ ہراٹی بندغ آتِہ زور ئٹ بیگواہ کننگ، بےقانودی کھسفنگ و اوفتا فکر ئے شیف کننگ کن مُر انگا ہند آتیا اوفتا جون تہ خسّنگ اوار ءُ۔ بےقانودی کھسفنگ نا دوانزدہ تدینی تیٹ محمد نواز، غلام بزدار و جعفر مری اوار ءُ ہرافتہ شش نومبر آ موسیٰ خیل آن بیگواہ کننگا و پدان کھسفنگا۔ بشیر احمد ہرا مئی ٹی گوادر آن بیگواہ کننگاسس، 23 نومبر آ آواران ئٹی اونا جون خننگا۔ شانزدہ سالی اسرار بلوچ ئے انسداد دہشت گردی محکمہ ہلّنگ آن پد خلک کھسفے۔
رپورٹ ئٹی پھاش کننگانے کہ دا فوجی حکمت عملیک بیرہ سرمچار تہ ٹِک کننگ ئسکان افس بلکہ لس مخلوق اسکان تالان مریرہ، خُلیس نا ماحول ودی کیرہ و راجی سزا نا چم آن کاریم ہلّنگک۔ فوج ئنا جہی لشکر (ڈیتھ اسکواڈ) دا ویل آتہ پین سوگو کیک۔ دا لشکر نہ بیرہ خَلیک کھسفک بلکہ دُزی و نشہ نا بے قانودی کاریم تیٹ ہم دا نا دُو ارے، و دا غُٹ ئٹی اودے موکل تننگانے۔
بلوچستان نا مخلوق تینا نسخان و خراب انگا حالت نا سوَب تباہی نا گواچی ءِ۔ پانک ئنا حساب آن سما تمک کہ زور ئنا بیگواہی و کھسفنگ آتا درست کچ گیشتر مننگ کیک، انتئے کہ انتظامی کاریم نا خُلیس آن بھازا تدینیک مون آ ہتنگپسہ۔
بلوچ نیشنل موومنٹ جہانی مخلوق آن زوت گام ہفّنگ نا خواست کرینے تاکہ ودّوکا زوراکی ئے توننگ و زمہ وار تہ قانود نا حوالہ کننگ مرے۔ بندغی حق آتا نمائندہ غاک پارینُہ کہ دا زوراکی تہ ایسر کننگ و زیمی مروکا خاہوت آتہ انصاف رسینگ کن جہانی وڑئٹ گام ہفّنگ لازم ءِ۔
