شال: زورئٹ بیگواہی تا برخلاف وائس فار بلوچ مسنگ پرسنز نا گدان ئے 5671 دے پورو مس۔ مشکے آن سیاسی جہدکار آک بسّر اواری نا درشانی کریر۔
ماما قدیر بلوچ بروکاتون بلوچستان ٹی بندغی حق و زورئٹ بیگواہی تا تران کرسہ پارے کہ دسمبر نا تُو ئٹی ایمنسٹی انٹرنیشنل نا حوال ئٹ پاکستان ٹی بندغی حق آتا افسوس کننگانے، ولے بیرہ باء ئٹ افسوس نا جہا جہانی ادارہ آتہ پاکستان ئے عملی وڑئٹ توننگ نا بارت ئٹ سوچوئی اے۔
او پارے کہ جہانی ادارہ آک پاکستان ٹی بندغی حق آتا برخلافی آ افسوس کیرہ ہراڑان دا راستی پھاش مریک کہ پاکستان نا ریاستی ادارہ آک جہانی قانود و بندغی حق آتا لتاڑینگ ئٹی اوار ءُ۔ ولے اسہ دہنو ادارہ ئس اف کہ او دادے منّسہ زورئٹ بیگواہ تا خاہوت آتا توار ئے خف تورِہ۔
ماما قدیر بلوچ پارے کہ عملی وڑئٹ گڑاس مننگ آن ویتہ بلوچستان ٹی بندغی حق آتا برخلافی ایسر مفک۔ بندغی حق آتا ادارہ آتہ ملکی و جہانی تیبر آ ریاستی ادارہ آتہ قانود نا پابند کننگ کن سوگوی ئٹ توروئی تمّو۔
وائس فار بلوچ مسنگ پرسنز نا گدان ئٹی نورالدین، لعل جان، وہاب و ایلوفک بسّر بشخ ہلکُہ ہندن وی بی ایم پی نا جہد و زورئٹ بیگواہ بندغاتا خاہوت آتون اواری نا درشانی کریر۔
