کیچ: پنی آ بلوچ راج دوست راہشون استاد واحد کمبر نا زوراکی نا بیگواہی نا برخلاف اونا خوہوت نا کنڈ آن 19 دسمبر آ تربت ئٹی عطا شاد ڈگری کالج آن شہید فدا احمد چوک ئسکان برانزی ریلی نا پڑو کننگانے و اندا رد ئٹ تربت ئٹ پمفلٹ بشخنگا۔
استاد واحد کمبر نا مسڑ ایڈوکیٹ شاری بلوچ و مہلب بلوچ برانز نا پڑو کرینو و دا رد ئٹ او کیہی دے آن کیچ ئنا جتا علاقہ تیٹ چائندئی مہم ہم چلفنگ ءُ۔
کیچ ئنا جتا سیاسی، چاگڑدی و بندغی حق آتا تنظیم آک و شخصیت آک برانزی ریلی نا مخ تفی ئے کرینو، و ڈسٹرکٹ بار ایسوسی ایشن کیچ برانز نا مخ تفی ٹی 19 دسمبر آ عدالت آتیان بائیکاٹ نا ہم پڑو کرینے۔
خیال ئٹ مرے، استاد واحد کمبر داکان مُست ہم پاکستانی لشکر و ایجنسی تا دو آن زوراکی ئٹ بیگواہ کننگاسس و پدا اودے عدالت ئٹ ہتنگاسس ہراڑے عدالت اودے شرف ئٹ بَری کریسس۔
استاد واحد کمبر 75 سالی اسہ کماشو سیاستدان ئس ءِ، و اونا خاہوت نا رد ئٹ او جتا ناجوڑی تا گواچی اس ہرا نا سوب آن تینا علاج کن ایران ئٹ روپوش اسک ہراکان پاکستانی ایجنسیک اودے دزگیر کرسہ بیگواہ کرینو۔
استاد واحد کمبر نا مسنک کیچ ئنا الس آن خواست کرینو کہ او ساندہ نا وڑ تینا راج دوستی نا ثبوت ایتر و ریلی ٹی اوار مریر۔ مہلب بلوچ پارے کہ اونا کماش آ باوہ ئے ڈیہہ ئنا عدالت آتیٹ ہتِسہ ٹرائل نا وارخواہی تننگ مرے۔ اگہ اوڑا ڈوہ ثابت متنے تو اودے زوراکی ئٹ بیدس قانود بیگواہ کننگ مف، بے قانودی دزگیر کننگ و بیگواہ کننگ اسہ بندغی المیہ ئس ءِ، ڈیہی و جہانی بندغی حق آتا ادارہ غاک دا نا سختی ئٹ نوٹس ہلیر۔
