زوراکی نا بیگواہ تا برخلاف جہد بلوچ راجی بقاء و راجی جہد ئٹی اسہ بھلو مسخت و خواست ئسے نا جاگہ ئے ہلّنگ ئٹی ءِ انتئے کہ دا راجی سزا نا سخت انگا دروشم ءِ ہراڑان بلوچ راج زیمی ءِ۔
دا خیال آتا درشانی ئے وائس فار بلوچ مسنگ پرسنز نا وائس چیئرمین ماما قدیر بلوچ زوراکی نا بیگواہی تا برخلاف بین برانزی گدان ئٹی کرے۔
اینو بین برانزی گدان ئے 5670 دے پورو مس۔ مستونگ آن خلیل احمد، عبداللہ، سلام نیشنل پارٹی نا بنجائی سیکریٹری اطلاعات احمد لانگو بسّر اواری نا درشانی کریر۔
ماما قدیر بلوچ تران کرسہ پارے کہ چھنکا و تینا جند ئنا اختلاف آک جہد ئے نزور کیرہ ننے تینا حق آتیکن گچینی ئٹ اوار مروئی ءِ۔ چھنکا چھنکا اختلاف آک ہراتم چاگڑدی حوالکاری میڈیا غا شنگ مریرہ تو اوفتا رد انگا اثر مُر ئسکان کائک۔
او پارے کہ داڑا بحث مروئی اف کہ دیر بلوچ نا حق ئکن برانز کننگ ئٹی ءِ انتئے کہ بلوچ نا ہر گلی ٹی بلوچ نا دتر وہنگ ئٹی ءِ۔ بےکچ بلوچ زوراکی ئٹ بیگواہ کننگانو و ایجنسی تا سزا جاہ تیٹ ظلم سہنگ ئٹی ءُ۔ بھاز آتا بارث ئٹ درست پاننگ مفک کہ او زندہ ءُ یا اشتماری قبر آتیٹ کھڈ ءُ، ہندن خلّنگ کھسفنگ نا چرجوئی ہم برجاء ءِ۔
ماما قدیر گدان آ بروکاتہ راجی اواری نا پارے کہ قبائلی جھیڑہ غا تا پن آ بلوچ چاگڑد نا پرغنگ آ کاریم مننگ ئٹی ءِ۔ ہر کُنڈ آ اسہ خاخر ئس لگّنگ ئٹی ءِ۔ لکّھ آ بلوچ آک لشکرکشی تا سوَب آن تینا اُراتہ الّانُہ ریاستی ادارہ غاک تینا مفاد کن ہر اُرا ئے ٹِک کرسہ اوڑے تینکن کمک کار جوڑنگ نا کوشست کننگ ئٹی ءُ۔
او پارے کہ ریاست نا پارہ غان دا وڑ ئنا گھام بلوچستان ئٹی بندغی حق آتا لتاڑ ئے پین گیشتر کیک، اومیت ءِ کہ بلوچ راج دوست پلْک آک و بلوچ راج اواری و سنّت ئٹ دافتون مون ترور۔
