بلوچستان نا ضلع مستونگ و تربت آن پین مُسہ بندغ نا زوراکی ئٹ بیگواہی نا تُدینی رپورٹ مسُنے۔
شابیتی حوال تا رد ئٹ کیچ ئنا بنجائی شار تربت آن پاکستانی لشکر پین اَسہ ورنا ئسے بیگواہ کرینے۔
خاہوت پارینے کہ شاہ جان ولد برکت علی ئے نن ئنا یک بجہ غا پاکستانی لشکر اونا اُرا سری کہن آن بیگواہ کرینے۔ خاہوت ورنا نا آجوئی نا خواست کرینے۔
ضلع مستونگ نا تحصیل دشت ئنا ہند آن پاکستانی لشکر سمیع کرد ولد محمد در محمد ورنا ئے اونا الہ نا مار تون اوار دزگیر کرسا بیگواہ کرینے ہرا دائسکان بیگواہ ءِ۔
بلوچ وائس فار مسنگ پرسنز تینا چاگڑدی حوالکاری تلہ ایکس آ نوشت کرینے کہ خاہوت حوالکار آک پک کرینو کہ سمیع کرد ولد در محمد ئے لشکر تدوکا تو 9 نومبر آ اونا الہ نا مار تون اوار دزگیر کریسر ہموتم آن بیگواہ ءِ۔
اندن قلات آن 8 و 9 دسمبر نا نیامیکو نن پاکستانی لشکر نا دو آن کلی زکریانی منگچر آن زوراکی ئٹ بیگواہ کننگوک مُسہ ایلم محبوب علی، ارشاد علی، و مرید احمد آجو مسُنو۔
یاتی مرے کہ اوفتا زوراکی ئٹ بیگواہی نا برخلاف خاہوت تُدوکا اِرا دے آن کوئٹہ کراچی کسر ئے منگچر نا جاگہ غا برانز کرسا بند کریسس۔ انتظامیہ تون مزاکرات و باور تننگ آن پد برانز ایسر کننگا و اینو اوفتے آجو کننگانے۔
