بلوچستان و کراچی آن زوراکی ئٹ بیگواہ کننگوک نُہہ بندغ یلہ مسنو۔
شابیتی حوال تا رد ئٹ اِرا دے مُست کراچی آن زوراکی ئٹ بیگواہ کننگوک بلوچ خوانندہ دودا الہی، گمشاد مرید، معراج بلوچ، مزمل بلوچ و اسماعیل و ابراہیم یلہ مسنو۔
اوفتا یلہ مننگ ءِ اوفتا خاہوت آک پک کرینو۔
پن کروک خوانندہ غا تِہ 8 دسمبر آ کراچی آن اسہ فلیٹ ئسے آن دزگیر کننگ آن گڈ بیگواہ کننگاسس۔ اوفتا زوراکی نا بیگواہی ئے بلوچ یکجہتی کمیٹی تون اوار اوفتا خاہوت آک پک کریسر۔
داکان بیدس ہنوکا جمعہ غا بلوچستان نا ضلع کیچ ئٹی پاکستانی لشکر نا دو آن زوراکی ئٹ بیگواہی نا گواچی مروک چھار بندغ آن مُسٹ آجو مسنو۔ ہرافتا چاہنداری عبدالسلام، یاسر و سالم نا پن ئٹ مسنے واہم حاجی حاصل دائسکان بیگواہ ءِ۔
اندن بلیدہ آن زوراکی ئٹ بیگواہ کننگوک ازیر امید و عبدالرحمان قدیر درو آجو مسنو ہرافتِہ تدوکا تُو 18 تاریخ آ پاکستانی لشکر پٹانی زامران، اُمید نا اُراغان دزگیر کرسا بیگواہ کریسس۔
