ہمسایہ ڈیہہ ایران آن پاکستانی ایجنسی تا دو آن زوراکی ئٹ بیگواہ کننگوک بلوچ راہشون استاد واحد کمبر نا خاہوت بیان ئس شنگ کرسا پارینے کہ استاد واحد کمبر اسہ شرفدارو راہشون و جہد ئنا چیدہ ئے اینو ننا مخ تفی بکار ءِ۔ اونا زوراکی ئٹ بیگواہی نہ بیرہ اونا خاہوت بلکہ تیبہ قوم کن ڈکھ ئس ءِ۔
او پاریر کہ استاد واحد کمبر تینا تیبہ زند ئے مظلوم آ بلوچ قوم ئنا جہد کن تس و اینو او تینٹ ظلم ئنا گواچی ءِ۔ دا وخت ءِ کہ نن غٹ اونا آجوئی کن توار بڑز کین و جہان ئے کلہو ایتن کہ ظلم ئنا برخلاف سلینگ ننا اوڑدئی ذمہ واری ءِ۔
او خواست کرینو کہ 12 دسمبر آ پیشیم نا 3 بجہ غان شام ئنا 6 بجہ اسکان، چاگڑدی حوالکاری میڈیا ایکس آ مہم نا بشخ مبو و تینا اوڑدئی نا درشانی کبو۔
استاد نا خاہوت پارے کہ دا مہم بیرہ استاد واحد کمبر نا آجوئی کن اف بلکہ ہر ہمو بندغ کن ءِ ہرا آجوئی، انصاف و بندغی نا مخ تفی ئے کیک۔ نُما توار مظلوم آتا حق ئٹی کُل آن بھلو سلاہ ءِ، اندا سوب آن المی ءِ کہ نُم چُپ مفبو۔ ببو نن غٹ اوار استاد واحد کمبر نا آجوئی کن جہان نا ضمیر ئے ٹوہین۔
