بی ایل ایف نا جارکش میجر گہرام بلوچ میڈیا ٹی شنگ کروک تینا درشان ئسیٹی پارے کہ 08 دسمبر یک شمبے نا شام ئنا شش بجہ غا بلوچستان لبریشن فرنٹ نا اسنائپر ٹیکٹکل ٹیم( ایس ٹی ٹی) آواران نا ہند جھاؤ ٹی کوہڑو نا جہہ آ کوزہ گیر پاکستانی لشکر نا کیمپ ئنا پیشن سلوک لشکری کارندہ ئے اسنائپر ئٹ خلک۔
او پارے کہ اسنائپر ٹیکٹکل ٹیم( ایس ٹی ٹی) بلوچستان لبریشن فرنٹ نا ایلیٹ یونٹ ءِ ہراٹی سخت تربیت ہلوک و لائخ آ جنگول آک اوار ءُ۔ دا ٹیم خاص بلوچستان ئٹی کوزہ گیر و اونا اہم آ پوسٹ و کیمپ آتِہ ٹک کننگ نا سکت تخک، ہراڑے سرمچارک ہنرمندی ئٹ دشمن نا ہدف آتِہ ٹک کیرہ۔ اسنائپر ٹیکٹکل ٹیم ئنا بنداوی مسخت دشمن نا اہم انگا پوزیشن تِہ ٹک کرسا آپریشن تِہ سرسوب کننگ و دشمن نا ارادہ غا تِہ بےسوب کننگ ءِ۔ دا کاروائیک ایہن ڈکھکوک، تیز و اثرمند مریرہ، ہراٹی دانا مہارت و پوسکن آ سلاہ تا کارمرز اسہ اہمو کڑدار ئس ادا کیک۔ دا ٹیم تینا آپریشن تا وخت کیہی اہمو سرسوبی دوئی کرینے، ہرا بلوچستان لبریشن فرنٹ نا جنگی حکمت عملی تا اہم بشخ ئس ءِ۔
اونا پاننگ اس کہ سرمچار آتا ہر جاگہ غا جلہو تا سوب آن دشمن نفسیاتی بےسوبی نا گواچی ءِ ہرانا سوب آن او تینا جانی و مالی نسخان تِہ ڈکھکنگ نا بےسوب کوشست کیک۔
او ایسر ئٹ پارے کہ بی ایل ایف لشکری کارندہ ئے خلنگ نا زمہ واری ئے ہرفک، بلوچستان نا آجوئی اسکان پاکستانی لشکر و لشکری تنصیب آتا ننا جلہوک برجاء مرور۔
