بلوچستان نا ضلع کیچ آن پاکستانی لشکر اِرا ورنا دزگیر کننگ آن گڈ بیگواہ کرینے اندن کوئٹہ و سوراب آن مُسہ بیگواہو بندغ آجو مسنو۔
ضلع کیچ ئنا علاقہ دشت باہوٹ چات آن استو ننکان پاکستانی لشکر چھاپہ خلِسہ اِرا بندغ بیگواہ کرینے ہرا ابراہیم نا مار وارث و بوہیر نا مار گلاب نا پن تیٹ درست مسنو۔
تومکا تِہ چھاپہ نا وختا دزگیر کننگاسس ہراکان گڈ تومکا بیگواہ ءُ و اوفتا ہچ ڈس اف۔
ایلو کنڈ آن بلوچستان نا بنجائی شار کوئٹہ آن برجاء سال 6 اگست آ زوراکی ئٹ بیگواہ کننگوک غلام نبی (حاجی نور احمد ساتکزئی نا مار) و نعیم ( گلزار ساتکزئی نا مار) ڈغاری کوئٹہ نا جہی، آجو مرسا تینا اُراغا سر مسنو۔
پن کروک تومکا بندغ آک کولا کانڑ ئٹ مزوری کریرہ ہرافتِہ زوراکی ئٹ بیگواہ کننگاسس۔ اوفتا آجو مننگ نا حوال ئے اوفتا خاہوت پک کرینے۔
اندن سوراب آن 8 دے مُست بیگواہ کننگوک بی این پی مینگل نا کونسلر کلیم اللہ رودینی یلہ مسنے۔
یات مرے ہنوکا دے تیٹ کلیم اللہ رودینی نا بیگواہی نا برخلاف سوراب نا ہند آ کیہی ساعت اسکان برانز نا سوب آن کراچی، کوئٹہ کسر بند اسک۔
