نیشنل ڈیموکریٹک پارٹی بارکھان ہنکین ہفت دسمبر کوہ سلیمان نا شہید آتِہ دروت ندر کرسا پارے کہ ہر راج ئٹی شہید و اوفتا قربانی تِہ قدر ئٹ ہُننگ مریک، ہر شہید نا دے ئے توننگ نا مسخت ہندا عہد و پیمان مریک کہ نن و ننا بروک آ زنک ہندا وڑ تینا سرزمین نا رکھ ئکن نوآباد کار و نوآبادیاتی قانود نا برخلاف ہندا وڑ تینے ندر کرو ہندن کہ کوہ سلیمان نا شہید و ایلو شہید آک تینے ندر کرینو۔ ہندا بلوچ نا عظیم آ فرزند آک تینا ساہ ئے ترسا کوہ سلیمان نا سرزمین ئے دشمن نا دوٹی ہننگ آن بچفیر، اوفتا قربانیک نہ بیرہ بلوچ نا تاریخ نا اہمو بشخ ئسے ءُ بلکہ دا ننے راجی ٹیوار و آجوئی و شرف ئنا کسر ئٹ ہننگ نا سبخ ایترہ۔
کوہ سلیمان نا شہید آک اسِہ ہندنو وخت ئسے آ تینے ندر کریر ہراتم اوفتون پوسکُن آ سلاہ تا کمبوتی اسک، ولے اوفتا حوصلہ غاک بُڑز اسُر، اوفتِہ وطن دوستی نا جوزہ سرکاری لشکر تون مون تس نا تاقت تِسک۔ ہندا دلیر آ ورناک تینا سرزمین نا رکھ کِن سنگر آ سلوک اسُر و جنگ کریر اوفتا قربانیک اینو ہم ننا اُست آتیٹی زندہ ءُ۔ نن اینو ہم اوفتا مشن ئے برجاء تِخنگ نا حوصلہ تون ہندا دے ئے یات کینہ۔
ننے فخر ءِ کہ کوہ سلیمان نا شہید آ ورناک تینا باوہ پیرئی آ کسر ئٹ ہنِسہ تینا راجی حق و سرزمین نا رکھ ئکِن جہد کریر، 7 دسمبر 1967 نا جنگ ئٹ شہید مروکا تا دِتر ننکِن روشنو کسر ئس ءِ، اوفتا قربانیک نہ بیرہ کوہ سلیمان بلکہ مُچ بلوچستان ئٹی بلوچ راجی حق ئنا تحریک نا بنماسی خِشت ثابت مسک۔
نن دا شہید آتِہ دروت ندر کینہ و اوفتا خنوک آ تُغ و اوفتا قربانیک ہر بلوچ نا اُست ئٹ زندہ سلور، اوفتا اصول ، مسخت و جہد دیہاڑ نا بشخ ءُ۔
