بلوچستان نا دریائی شہر گوادر آن حوالءِ کہ شام ئنا پاکستانی لشکر خوانندہ زاہد مصطفےٰ ئے زوراکی ئٹ بیگواہ کریر۔
ہندا خوانندہ گوادر یونیورسٹی ٹی ڈیٹا سائنس ئنا خوانندہ سے ہرادے ہنوکا شام پنچ لاری ٹی سادہ و وری بینوک پاکستانی لشکر نا کارندہ آک گوادر آن اونا اُراغان بیگواہ کریر۔
خاہوت نا رد ئٹ دا وخت اُرانا بندغ آتا تشدد ہم کننگا۔ مزاحمت کننگا اُرا والاتے توفک نا بٹ ئٹ خلکُر و سُمکاری ہم کریر۔
ہندی حوالکار عین قادر پارے کہ ہنوکا منہ ہفتہ آن ریاستی ادارہ آتا نیمغان گوادر و خُڑک ئنا ہند آتیٹی غیر آئینی گامگیج و شہری تا بنیاتی حق آتے لتاڑنگ زوراکی ئٹ بیگواہی تا تدینی تیٹی گیشی بسونے۔
او خواست کریر کہ زوراکی ئٹ بیگواہی نا انسانیت سوز کاروائیک زوت بند کننگ مریر۔ زاہد مصطفےٰ تون اوار تیوغہ بیگواہ مروکا بندغ آتے زوت آجو کننگ مرے۔
