‘وائس فار بلوچ مسنگ پرسنز’ نا بھلنی ٹی زورئٹ بیگواہ بندغاتا یلئی کن بین ہڑتالی گدان ئے 5656 دے مس، وڈھ آن بروکا اللہ بخش مینگل، درمحمد مینگل، غلام نبی مینگل و ایلو نیاڑیک بسّر اواری نا درشانی کریر۔
‘وائس فار بلوچ مسنگ پرسنز’ نا وائس چیئرمین ماما قدیر بلوچ تران کرسہ پارے کہ پاکستان اسہ ہندنو ریاست ئسے ہرا جہانی قانود و بندغی شرف آن دُو تہ سلّانے۔ دا نہ بیرہ بلوچ وطن آ کوزہ کرینے بلکہ مچّا خطہ نا امن و شونداری کن پھاشو خطرہ سے۔
او مُستی پارے کہ پاکستانی ریاست اسہ رنگ بلوچ راج ئنا برخلاف زوراکی کننگ ئٹی اے۔ ہرافتیٹ بلوچ ورنا تا زورئٹ بیگواہی، شہیدی، اُراتہ ہشنگ و مال و مڈی تا لُٹ و پُل بریرہ۔ پاکستانی ریاست نا دا زوراکیک بلوچ جہد ئے توننگ نا بےسوبو کوشست ءُ۔
اونا پاننگ کہ ہزارا بلوچ ورناتہ ایجنسی و سی ٹی ڈی درینُہ سزا تننگ ئٹی ءُ۔ فوجی لشکرکشی نا وسپہ ئٹ بلوچستان نا کُنڈ کُنڈ آ ظلم و تادی کننگک۔
ماما قدیر بلوچ پارے کہ تاریخ گواہ اے کہ ظلم و زوراکی ئٹ راج آتا کس زور تمنگ کپک۔ پاکستانی ریاست نا زوراکی بلوچ راج ئنا جوزہ ئے پین بُڑزا دننگ ئٹی اے و جہد آ یقین ئے بتّر سوگو کننگ ئٹی اے۔
