بلوچستان نا شہر کوئٹہ و اوتھل ئٹی بلوچ خوانندہ تا برانز ئٹی جتا جتا جیڑہ آتا اینو ہم برجاءءِ۔
حوال تا رد ئٹ بلوچستان نا بھلا شہر کوئٹہ و اوتھل ئٹی بلوچ خوانندہ آتا نیمغان بولان میڈیکل کالج و اوتھل یونیورسٹی نا مونا برانز آک اینو ہم تیزی تون برجاء ءُ ہراڑے بھلو کچ ئسیٹی خوانندہ آک برانز ئٹی اوار اسُر۔
اوتھل یونیورسٹی نا خوانندہ آک زوراکی ئٹ بیگواہی تا برخلاف ہنوکا دے یونیورسٹی نا بھلا دروازہ نا مونا برانز کریر، ہرا اینو ہم برجاءءِ۔
خوانندہ تا پاننگءِ کہ دا برانز بیان بلوچ نا آجوئی کن مننگءِ، ہرا منہ دے مُست اوتھل بازار آن ایلو خوانندہ تون بیگواہ کننگاسس، برانز ئٹی خوانندہ تعن اوار بیان بلوچ نا خاہوت ہم اوارءِ۔
ہندا موقع آ اوتھل یونیورسٹی نا مونا برجاء انگا برانز ئنا ٹک آ سمینار کرسا بیگواہ مروکا خوانندہ تا آجوئی نا خواست کننگا۔
ایلو نیمغا کوئٹہ ٹی بولان میڈیکل کالج نا خوانندہ آتا برانز اینو ششمی دے آ ہم برجاء، برانزیک کالج و ہاسٹل تا بندی نا برخلاف برانز کننگءُ و خواست آتا منظوری اسکان برانزئے برجاء تخنگ نا عزم ظاہر کننگءُ۔
خوانندہ آک دوبہ خلکنو کہ ہاسٹل آتا لشکر نا قوضہ و انتظامیہ نا بے حسی اوفتا خواننگ نا مستقبل ئے نسخان تننگءُ۔
خوانندہ تا رد ئٹ دا برانز اوفتا حق اکن مننگءِ و اوفک ہچ وڑ ئٹ ختم کپرور برانزئے۔
