بلوچ یکجہتی کمیٹی نا راہشون ڈاکٹر ماہرنگ بلوچ پارے کہ بلوچستان ئٹ تدوکا 24 گھنٹہ نا وخت ئٹ زوراکی ئٹ بیگواہ کننگوک چھار بندغ تا جشوک جونک تا ملنگ فریشانی نا ہیت ئس ءِ۔
او پارے کہ تدوکا دے آواران ئٹ اِرا بندغ نا جون خننگانے ہرافتا چاہنداری فقیر جان و عیسیٰ بلوچ نا پن ئٹ مسس۔ فقیر جان ئے پاکستانی لشکر 26 ستمبر 2024 آ اونا خلق آن دزگیر کننگ آن پد بیگواہ کریسس، عیسیٰ ئے 17 فروری 2023 آ زوراکی ئٹ بیگواہ کننگاسس۔
ماہ رنگ بلوچ پارے کہ اینو خضدار نا ہند زہری آن اِرا جشوک جون خننگانے ہرافتا چاہنداری عابد حسین ولد غلام حسین و مستی خان ولد گوہر خان سکنہ زہری نا پن ئٹ مسنے۔ تومکا تِہ 2017 ٹی پاکستانی لشکر زوراکی ئٹ بیگواہ کریسس۔
او پارے کہ منہ دے مُست گوادر آن زوراکی ئٹ بیگواہ کننگوک بشیر احمد نا جشوک جون خننگاسس، بیدس داکان کہ سیکیورٹی اونا دزگیری نا یلہ اعتراف کریسس۔ ہندن منہ دے مُست تربت آن اسرار بلوچ پنیئو ورنا ئسے نا جشوک جون خننگاسس۔
او پارے کہ بندغی حق آتا تنظیم آتِہ دا بھلا ویل آتیا زوت نوٹس ہلنگ مرے۔
ماہرنگ بلوچ پارے کہ پاکستانی لشکر زوراکی ئٹ بیگواہ کروک بندغ آتِہ خلنگ ءِ و اوفتا جشوک آ جون تِہ خسّنگ ءِ۔
