زرعی یونیورسٹی اوتھل نا خوانندہ غاک دا زوت ئنا زوراکی ئٹ بیگواہی تا برخلاف برانز کریر، برانز ئٹ خوانندہ و استاد آک اوار مسُر یونیورسٹی نا تہٹی ریلی کشار۔
برانزیک تینا دو تیٹ عکس و پلے کارڈ ہرفیسُر و بیگواہ کننگوک سنگت خوانندہ غاتا زوت آجوئی نا خواست کریر۔
برانزی تا پاننگ اسک کہ ” تعلیم نا پِڑ ئے ہم بے رکھوک کننگانے خوانندہ غاتِہ بیگواہ کننگ نا قابل قبول ءِ، دا ننا خواننگ و ذاتی زند ئتون گوازی کننگ ءُ، نن تینا سنگت آتا واپسی اسکان چپ مفرون۔
خوانندہ غاتا رد ئٹ تدوکا دے اوتھل بازار آن چھار خوانندہ دزگیر کننگا ہرافتیٹ گلاب، بالاچ، بیان و ناصر اوار اسر منٹ آک تا آجو مسر ایلوفک دائسکان بیگواہ ءُ۔
برانزی خوانندہ غاک پارینو کہ بلوچستان نا خوانندہ غاتِہ ہروخت ٹک کننگ مریک، ولے نن تینا حق اکن توار بڑز کرسا کرون۔ اگہ ننا سنگتاک آجو متور گڑا نن تینا برانز ئے پین ترند کرون و دانا کل زمہ واری انتظامیہ و کالخواہ تیا مرو۔
