کماش بلوچ آجوئی دوست راہشون استاد واحد کمبر بلوچ نا مسڑ مہلب واحد کمبر تینا درشان ئٹی پارینے کہ کنا باوہ ئے ریاستی سزا جاہ تیٹ اونا مچا زند ئنا جہد آ پشتائینگ آ مجبور کننگک۔
او پارے کہ پِنی آ سیاسی راہشون واحد کمبر بلوچ تینا زند ئنا پنجا سال بلوچ جہد ئٹی خَلکنے۔ اونا سوگوا فکر و قربانیک اودے ریاست نا بیہار آتا سوَب وطن ئے الّینگ آ مجبور کریر۔
مہلب واحد کمبر نا پاننگ کہ او کنا باوہ ئے تینا سزا جاہ تیٹ بند کرینُہ، اونا فکر ئے پرغنگ نا کوشست کننگک و اودے غُٹ زند ئنا جہد آ پشتائینگ آ مجبور کننگ ئٹی ءُ۔ داسا او سزا جاہ تیٹ تینا فکری بقا نا جنگ ئے کننگ ئٹی اے۔ انصاف و بندغی حق آتا پھاش برخلافی ٹی، ریاست غُٹ قانود آتہ لتاڑسہ اودے پین ملک ئسے آن بیگواہ کرینے، و اودے عدالت آ ہتنگ ئٹی بےسوب اے۔ دا زوراکی اسہ ہندنو کماش ئسے آن ریاست نا خلیس ئے پھاش کیک ہرانا اسٹّا ڈوہ تینا مخلوق نا حق و شرف کن مُچ زند ئنا جہد اے۔
او پارے کہ کنا باوہ رہبند دوست و تینا فکر آ سلوکو بندغ ئسے۔ ولے ریاست اوڑان تینا جہد آ پشتائینگ نا اومیت تخک، دا اونا قربانی تا میرات یا اونا جوزہ نا سوگوی ئے چھٹفنگ کپک۔ اودے سزا جاہ تیٹ تخنگ ہمو زوراکی تہ یات شاغفک ہراڑے ظالم حکومت آک اختلاف ئے شیف کننگ و ہمو مخلوق آتون چُپ کرفنگ کن کیرہ، ہرا تینا جْواننگا بروکاتم نا تُغ ئے خننگ نا ہمت تخرہ۔ اودے عدالت آ ہتنگہ و قانود نا وڑئٹ سزا تننگہ۔
