سئے شمبے نا دے بلوچستان نا تیابی شار گوادر ئٹی بلوچ یکجہتی کمیٹی نا رہشون ڈاکٹر ماہ رنگ بلوچ گوادر بار روم آ بس، دا موقع آ گوادر بار نا کماش نعیم شریف و ایلو اونا بخیرئے کریر۔
دا موقع ئٹ ڈاکٹر ماہ رنگ بلوچ وکیل آتون تران کرسا پارے کہ ننے خاص کر اسِہ سیاسی باسک و وکیل ئے اسِہ منظم ءُ جدوجہد ئس کروئیءِ انتئیکہ ننا بندغ آتے خبر اف کہ انت مننگے، اوفک مُست آن زوراکی تا گواچیءُ اینو لشکر اوفتا اُراتے ہُشیک، اوفتے بے اُرا کیک کس ہم جُست کروکوس اف۔
او بلوچستان ئٹی برجاء آ لشکر کشی نا بابت ئٹ پارے کہ اسِہ جُست ئس ودی مریک کہ بلوچستان ئٹی لشکر کشی نا فیصلہ کروکا باڈی واقعی اسِہ قانونی باڈی ئسے ہرا دا فیصلہ تے ہرفے؟
او پارے کہ بلوچستان ئٹی لشکر کشی آ اینو پاکستانی دانشورآک ہم بے توار ءُ۔ پنجاپ نا دانشور، صحافی و باسک آتا خواست مسونے کہ بلوچستان ئٹی لشکر کشی کننگ مرے۔ ہندا سوب آن نن دا (ظلم) ئنا برخلاف اسِہ سیاسی تحریک ئس کننگ اُن۔
او پارے کہ پاکستان نا عدالتی نظام ہم بلوچ نسل کشی ٹی اوارءِ، مُستی او اسِہ کریک ڈاؤن ئس کننگ کیرہ ولے بلوچ راجی بقا نا کن دا تحریک ئے پین منظم کننگ نا بکارءِ۔
