‘وائس فار بلوچ مسنگ پرسنز’ نا بین ہڑتالی گدان ئے اینو 4647 دے مس، منگچر آن بروکا سیاسی و چاگڑدی جہدکار برکت حسین بلوچ، محمد عثمان بلوچ و نور محمد بلوچ اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ بلوچستان ٹی ہنوکا ہفتاد و پنچ سال آن برجا بندغی حق آتا برخلافی وخت ئنا گدرینگ تو اوار اوار گیشتر مننگ ئٹی اے۔ بلوچ ورنا تہ بیگواہ کننگ، اوفتہ سزا تننگ آن پد بےقانودی ئٹ خلّنگ ہڑدے نا گڑاس مسّنے۔ ورنا، پیرنگا، نیاڑی و چُنا غُٹ ئنا زند ریاستی زوراکی تا سوَب دڑدی مسّنے۔ زوراکی آن بھازا خاہوت آتان اوفتا روزی نا وسیلہ و مالْک ہنانُہ۔ بھازا خاہوت آک تینا بندغاتا سلامتی و عزت کن ہمپنگ آ مجبور مسّنہ۔ بلوچستان ٹی مخلوق نا زورئٹ بیگواہی و بےقانودی ئٹ خلّنگ ئے 2002 ئنا بِنا ٹی زیات کننگا، بلوچستان آن زورئٹ بیگواہ بندغاتا کچ ہشتاد ہزار آن گدرینگانے و ہزاراتا کچ ئٹ لاش خسّنگانے ہرا بندغی حق آتا برخلافی نا پھاشی ءُ دافتان ہِچ وڑئٹ انکار مننگ کپک۔
ماما قدیر بلوچ پارے کہ بھازا لاش آتا خننگ و اوفتہ ڈی این اے آن ویتہ بےوارث سرپند مرسہ کھڈ کننگ آ کاٹم تولپک، ہرا بلوچستان حکومت نا زورئٹ بیگواہ تا معاملہ ئے لڑونج کننگ و ڈوہ دار ادارہ و بندغاتہ بےگناہ کننگ نا کوشست ئسے۔ نن دا ڈوہ ئٹی بلوچستان حکومت، سی ٹی ڈی و ایف سی ئے شریک سرپند مرینہ۔ لاش آتا خننگ و اجتماعی قبرآتا ملّنگ بلوچستان ٹی پوسکن افس، داکان مہالو ہم توتک، پنجگور، ڈیرہ بگٹی و بلوچستان نا جنگ آن زیمی علاقہ آتیٹ اجتماعی قبر خننگانے ہرا بیگواہ بندغاتا مسّنہ، اینو ہم خننگوکا لاش آک بلوچستان آن زورئٹ بیگواہ بندغاتا ءُ۔
