وائس فار بلوچ مسنگ پرسنز (وی بی ایم پی) نا بھلنی ٹی بیگواہ تا یلئی کن شال پریس کلب نا مون آ بین ہڑتالی گدان ئے اینو 5646 دے مس، تربت آن بروکا سیاسی و چاگڑدی جہدکار نبی بخش بلوچ، ظہور بلوچ و ایلو نیاڑیک بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ پاکستان نا ظلم و تادی نا تاریخ نا پنّواک ریاستی سزا جاہ تا داستان آن پُھر ءُ۔ بلوچستان نا ورناتا دتر وختس ریاستی سزا جاہ تا دیوال آتا چھٹ کرے تو وختس زمین نا مِش تا وہفنگا۔
ماما قدیر بلوچ مُستی پارے کہ بھاز ہندنو مونو نن ننا تاریخ نا بشخ ءُ ہرافتیٹ شبیر بلوچ آن بارنگا بےخُلیسا ورناک ریاستی سُم تا مون ٹی مسّہ۔ وختس ہندا تارمئی تا پلمندہ ئٹ ورناتا لاش تہ ہیلی تیان خسّنگا، تو وختس اوفتا تیزاب شاغنگا، ڈِرل مروکا لاش تہ بےدڑدی ئٹ خسّنگا۔
او مُستی پارے کہ زیرو پوائنٹ نا کسر تیان ہلیس پنجگور نا پٹ آتسکان و مرگاپ نا گلی تیان ہلیس شیراز نا وادی اسکان، ہر جہہ آ مہسوما چہرہ آتا داستانک تالان ءُ۔ اوفتا ڈوہ بیرہ ہندا اس کہ او سیاسی جہد ئے منّارہ و گناہ بیرہ ہندا اس کہ او زوراکی نا مون ٹی شیف متوسہ۔
ماما قدیر بلوچ پارے کہ دا شہیداک ہرا تینا ساہ تہ ندر کریر ولے تینا جوزہ و یقین ئے نزور مننگ التوس، دنیا نا غُٹ تحریکاتا بشخ ءُ ہرا بندغی کن جہد کیرہ۔ دا ورناک ہرا ننا وطن آن ودی مریرہ، سال آتان برجا جہد ئنا چرجوئی ئے گھنڈیسہ مُستی کارہ۔ اوفتان بھازاتا پِن تہ چہرہ آتہ نن تپنہ ولے او غُٹ ننا جہدکار ءُ ہرا تینا جہد ئنا چراغ ئے لگّفینُہ۔
