بلوچ یکجہتی کمیٹی نا بھلنی ٹی شہید بالاچ مولا بخش نا سال پوروی آ سیمینار اڈ تننگا۔
بلوچ یکجہتی کمیٹی کیچ ئنا بھلنی ٹی شہید بالاچ مولا بخش نا سال پوروی آ اسہ سیمینار ئس اڈ تننگا سیمینار شہید فدا چوک تربت آ اڈ مس، ہراٹی جتاء فکر ئنا بندغ آک، وکیل و الس ئنا بھلو کچ ئس اوار اسک۔ تربت سیمینار ئٹ کوئٹہ تون اوار بلوچستان نا ایلو ہند آ تیان بلوچ یکجہتی کمیٹی نا راہشونک، وکیل و سیاسی رہنما و باسک آک اوار مسر۔
ہموتم سیمینار تون تران کرسا بلوچ یکجہتی کمیٹی نا بنجاہی آرگنائزر ڈاکٹر ماہرنگ بلوچ پارے کہ ریاست عوام نا وسائل تا لُٹ و پل و نسل کشی نا پالیسی تیا عمل کننگءِ، او پارے کہ تدوکا بیست سال آتیان بلوچستان ئٹ ہردے جون خسنگک۔
ڈاکٹر ماہرنگ بلوچ پارے کہ شہید بالاچ نا جون ئے لاوارث سمجھیسہ خسنگاسس، ولے اونا خاوہوت چُپی نا جاگہ برانز ینا کسر ہرفے 23 نومبر آن 6 دسمبر 2023 اسکان تربت ئٹی جون تون اوار برانز کننگا،ہراکان پد نن تربت آن اسلام آباد اسکان لانگ مارچ کرین۔
او مُستی پارے کہ ریاستی زوراکی تیان ںیدس بلوچ الس ئے تینا جہد برجاء تخوئی ءِ، تدوکا سال ئنا وخت ئٹ 200 آن زیات ورنا بیگواہ کننگانے، بلوچ نا ہر اُرا درد ئنا گواچی مسنے۔
سیمینار ئٹ مکران ہائی کورٹ بار نا صدر محراب خان گچجی ایڈوکیٹ پارے کہ بندغ آتے زوراکی ئٹ بیگواہ کننگ اسہ خرابو جرم ئسے، ہرا نہ بیرا ملکی آئین بلکن جہانی قانون تا خلاف ورزیءِ۔
او پارے کہ ہنوکا وخت ئٹی بنگال ئٹ دا تجربہ نا تباہ کن نتیجہ پیشتما و داسا ہندا تجربہ بلوچستان ئٹ کننگک۔
کیچ بار ئنا صدر عبد المجید شاہ ایڈوکیٹ ریاست نا برجاء انگا آپریشن تے تنقید نا گواچی کرسا پارے کہ 70 سال آتیان کننگوکا آپریشنک ہچ جوانی ہیتنو، بلکہ حالیت آک پین زیات خراب مسنو۔
بلوچ یکجہتی کمیٹی نا راہشون صبغت اللہ شاہ جی پارے کہ بالاچ نا شہادت ننا جہد ئے پُوسکنو تحریک تسُنے۔ او اُلس آن اتحاد ئے برجاء تخنگ و ریاستی سازش تے بے سُہب کننگ نا خواست کرے۔
ہندا موقع آ عبدالمجید دشتی ایڈوکیٹ پارے کہ بلوچ یکجہتی کمیٹی نہ بیرا ہندی بلکہ جہانی سطح آ بلوچ مسلہ تے ہرفنگ نا بکار ءِ۔ او تجویز تس کہ اَسہ ہندونو ٹیم ئس جوڑ کننگے ہرا جہانی عدالت ئٹ بلوچ آتا مقدمہ ئے دے۔
سیمینار ئٹ شہید بالاچ نا ایلم یونس بلوچ و مجیب رحیم شعر تیٹ شہیداتے دروت ندر کریر۔ ہیت کروک آک عہد کریر کہ بلوچ اُلس ئنا حق و انصاف نا جہد ئے برجاء تخنگ مرو۔
ہیت کروک آک ایسر ئٹ پاریر کہ دا سیمینار دا ہیت ءِ نشان تیک کہ شہید بالاچ مولا بخش نا قربانی بلوچ اُلس ئنا است ئٹ جہد ئنا پوسکنو جوش ودی کرینے، ہرا زوراکی تا برخلاف اَسہ منظم و متحد عوامی تحریک ئسے نا سوب جوڑ مننگءِ۔
