زوراکی ئٹ بیگواہ مروکا عبدالرشید نا ایڑ پارے کہ کنا ایلم عبدالرشید بلوچ ئے 17 نومبر 2012 آ جناح ٹاؤن، کوئٹہ آن سلاہ بند بندغ آک زوراکی ئٹ برمتہ کریر۔ دا افسوسناک تدینی آن پد ننا خاہوت ئے اونا ہچو حوال رسینگتنے۔ عبدالرشید بلوچ نا زوراکی ئٹ بیگواہی ئے داسا دوازدہ سال پورو مسونے اونا خاہوت انصاف کن ہروکءِ۔
او پارے کہ زوراکی ئٹ بیگواہی بندغی حق آتا برخلافءِ ہرا بیگواہ مروکا بندغ و اونا خاہوت کن ناقابل برداشت و غیر یقینی نا کیفیت ودی کیک۔ دا مسلہ نا تنیا متاثر مروکا خاہوت بلکہ تیوعہ چاگڑدی انصاف نا اصول آتیکن سوال ئسے۔
نن کُل بندغی حق آتا تنظیم، سول سوسائٹی و حکومتی ادارہ تیان خواست کینہ کہ اوفک عبدالرشید بلوچ نا زوت آجوئی کن تینا کڑدارئے ادا کیر و پاکستان ئٹی زوراکی ئٹ بیگواہی تا مسلہ ئے ایسر کننگ کن جوانو گامگیج ہرفیر۔ دا مسلہ ئے حل کننگ کن زمہ وار تے انصاف نا کٹہرہ ٹی ہتنگ مرے و متاثر مروکا خاہوت آتے انصاف تننگ مرے۔
او پارے کہ 27 نومبر 2024 آ ایکس آ عبدالرشید نا آجوئی کن کیمپئین ئس مرو۔ نن کُل انسان دوست بندغ آتیان خواست کینہ کہ اوفک دا کیمپئین ئٹی اوار مرسا توار بُڑز کیر و عبدالرشید بلوچ تون اوار کُل بیگواہ مروکا بندغ آتا آجوئی نا خواست کیر۔
او پارے کہ زوراکی ئٹ بیگواہی تا مسلہ تنیا اسہ خاہوت ئسینا افک بلکہ دا انسانیت نا برخلاف جرم ئسے۔ ننے اوار مرسا زوراکی ئٹ بیگواہی تا ایسری کن کاریم کننگ خواہک تاکہ ہر شاری ئے آزادی و انصاف نا حق رسینگے۔
