زوراکی نا بیگواہی تا برخلاف گدان ئے اینو 5645 دے مس، نواب شاہ سندھ آن بروکا دلدار بلوچ، سومر خان منگی و ایلوفک گدان آ بسر و اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ ظلم و زوراکی ہراتم زیات مرے، بندغ تینا جند ئنا وطن ئٹی بدر مرے، آجوئی نا رنگی آ تُغ تہ غلامی نا طوق بینفر، پھل آتا رزان ئے پِت آن پُھر کیر۔ ہراتم فرعونی ٹی برسہ چراغ آتہ کھسفنگہ و دتر نا جو وہفنگہ تو آشوب نا ڈس ئس پھاش مریک و دڑدی آ چہرہ آتا ہم بشخندہ تالان مریک۔ جہد ئٹی بیر ہلّنگ نا جوزہ ہنداخہ گیشتر مریک کہ او بندغ تینٹ اسہ آشوب ئس جوڑ مریک۔
ماما قدیر بلوچ پارے کہ دا مُد ئنا یخ آ تہو تینا زور آن ہر ہمو گِڑا ئے ہفک خسّک ہرا اونا مونٹی سلِک۔ یخ ئنا زور ہر گڑا ئے پلویڑ کرینے و ہرکس تینا اُراٹی بند مسّنے سلیسنے، کس ئس بےسوَب تینا اُرا ئے الّیپک، ایلو نیمہ آ دا یخ ئنا مُد ئٹی شال پریس کلب نا مون آ وی بی ایم پی نا زوراکی ئٹ بیگواہ کننگوک بندغ آتیکن گدان خَلوکے۔ ہراڑے بیگواہ تا چناک تینا بندغ آتا عکس آتتون توسنُہ، دا مہسوم آ چناک ہرافتا اینو گوازی نا وخت ءِ ولے دافتان گڑا ئسے آ باوہ نا سیخا اف، گڑا ئسے ایلم نا مہر آن بےسواد کننگانے۔ اوفتا جتائی ٹی خڑینک شولسہ بندغی حق آتیک و آزات عدلیہ کن توار ہفّوکا تیان سوج کیرہ کہ ارانگ ہنار انصاف نا کسہ غاک؟ مہنگائی و بےروزگاری آ مچا ریاست نا قلمک بادوی کیرہ ولے بیگواہ غا بندغ آ ویل آ اینو ہر کُنڈ آ چُپی و منافقی انتئے؟
