نوشکی ئٹ آپریشن نا وخت پاکستانی لشکر ہشت بندغ تے زورانسری بیگواہ کرے۔
تدوکا دے تیٹ بلوچستان نا ضلع نوشکی نا مَش تیٹ پاکستانی لشکر مُسہ دے اسکان آپریشن ئٹ آختہ مس۔ آپریشن ئٹ گن شپ و ہیلی کاپٹر آک بشخ ہلکر، ہموتم جتا ہند آ تیا کارندہ ہم دڑفنگا۔
حوال تا رد ئٹ آپریشن نا وخت لشکری کارندہ غاک ہشت بندغ زورانسری بیگواہ کریر ہرافتیٹ ملا نذیر سمالانی، فقیر محمد سمالانی، جان محمد سمالانی، ظفر اللہ ولد جان محمد سمالانی، محمد وارث سمالانی و ہاشم ولد سید جان ساسولی اوار ء، ارا کسریئو بندغ زورانسری ئٹ بیگواہ کننگانے ہرافتا چاہنداری مننگ کتنے۔
یاتی مرے کہ آپریشن نا وخت لشکری کارندہ غا تا نیمہ غان ہندی بندغ آتا ارا تِہ ہُشنگ تون اوار آبادی تیا مارٹر گولہ خلنگ نا حوال ہم بسس۔
آپریشن ئٹ آختہ کارندہ غاتِہ پنچ شمبے نا شام بلوچ لبریشن آرمی اَسہ جلہو ئسیٹ ٹک کرے۔ جلہو نا زمہ واری ہرفِسہ جارکش جیئند بلوچ پارے کہ سرمچارک خودکار سلاہ تیٹ جلہو کریر، جلہو ئٹی دژمن نا اِرا کارندہ ہموتم کھسکُر و چار ٹپی مسُر۔
کالخواک مُسہ دے اسکان برجاء آپریشن نا حوالہ ئٹ دائسکان ہچ شابیتی حوال تتنو۔
