پشتون خواہ نیشنل عوامی پارٹی نا باسک آک نزیر اچکزئی، جاوید بلوچ، اشرف ترک، عثمان بڑیچ، جانان ملاخیل و یونس بڑیچ بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ پاکستانی ایجنسی تا زوراکی تان پد ہم بلوچ ورنا تا جوزہ آک کم مننگ نا جہہ آ پین سوگو مریرہ، و راجی جہد ئنا سرسوبی پاکستان ئے بےسوب کرینے۔ ہندن جہانی مخلوق ہم دا ہیت ئے پہہ مسنے کہ سہیلی ایشیا آن بارنگا زمین آ امن نا ویدن بلوچ راجی جہد ئٹی ڈھکوک ءِ۔ بلوچستان نا فضا ئے تینا دتر تان خوشبو تروکا راجی ورناتا قربانی تان سُہب ئنا ٹِک تروکا دے ئے خنسہ دشمن ہپہ لڑزہ مسنے، او غُٹ بندغی قانود و جنگی قانود آتہ لتاڑسہ تینا فوج و ایجنسی تا وسپہ ئٹ ورناتون بھلو ظلم و تادی کننگ ئٹی گھٹ ءِ۔ ولے زوراکی، بیہار و غدار آتا کمک ئٹ بلوچ راجی جہد ئے توننگ ئٹی بےسوب مننگ آن پد داسا پاکستان تینا بندغاتا کمک ئٹ بلوچ وطن آ تینا پارلیمانی گچین کاری کرفسہ بلوچ پشتون راجی غلامی آ مُہر ئس خلّنگ نا تُغ ئے خننگ ئٹی ءِ۔
ماما قدیر بلوچ پارے کہ تاریخ گواہ ءِ کہ کوزہ گیر نا غُٹ ادارہ غاک پارلیمنٹ، عدالت، نوکر شاہی، فوج و ایلو مچّا ادارہ غاک مریر، اوفتان محکوم راج بلوچ، پشتون و سندھی ئے غلام تخنگ کن کاریم ہلنگک۔ پاکستان بلوچ وطن نا سودا ئے خلّنگ کن گڑاس بےایمانو بندغ ئے راجی نمائندہ و راج دوست پارسہ تینا پارلیمنٹ ئٹی دیک و دنیا ئے ہندا نشان تیک کہ بلوچ راج اونا کوزہ گیری نا برخلاف اف بلکہ گچینکاری نا بشخ مرسہ پاکستان ئے تینا منشا ئٹ منّانے۔
