بلوچ نیشنل موومنٹ ( بی این ایم) نا چئیرمین ڈاکٹر نسیم بلوچ پارے کہ حکومت پاکستان بلوچ سرزمین آ اسہ بھلو لشکر کشی ئسے نا پڑو کرینے۔ دا پڑو، پڑو نا کلہو، دا نا پد ندارہ (پس منظر)، و پیشن ندارہ غا سوچنک قومی تیبر آ تجزیہ و پامداری کرسا ردعمل تننگ ننا راجی، ڈیہی و سیاسی فرض ءِ۔ نن بائدے دننگا بیان آتِہ بے اہم و بیرہ پڑو سرپند مفن انتئے کہ دننگا بیان آک پہنادی و کثیرالجہتی مریرہ۔ ای اندا سرپند مریوہ کہ دا حکومتی فیصلہ و پڑو نا غٹ پاسو تا تجزیہ و ادراک کرسا راجی تیبر آ اوڑدئی ردعمل ئس مونا ہتین۔
کُلان مُست ننے بحیثیت راج ننے سوچنگ خواہک کہ ریاست پاکستان ہر وخت دا پائک کہ بلوچستان ئٹی لشکر کشی کننگ مرے یعنی بروکا وخت کِن لشکر کُشی تا دڑکو تننگک۔ داڑے زبان و لوز آتا کارمرز اسِہ خاص ءُ نفسیاتی چم بازی ئسے نا وڑ “فعل مستقبل” کِن کارمرز کننگک۔ دا مسخت نہ بیرہ برجاء لشکر کشی تِہ ڈھکنگ ءِ بلکہ اُلس ئنا پام ئے دا لشکر کشی نا پن آ اسل ویل و حالیت آن مُر کننگ ءِ۔ دا اسِہ منظم و پوسکنو پروپگنڈہ ئس ءِ۔ دا نا زریعت ئٹ دا تاثر تننگ مریک کہ پاکستانی ریاست و لشکر دائسکان بلوچستان ئٹی ہچ کُننگ اف انتس کہ مرو او بروکا وخت یا بروکا دے تیٹی مرو۔
پاکستانی ریاست و لشکر بلوچستان ئٹی کیہی سال آن لشکر کشی، زنک کشی و اشتماعی سزا برجاء تخانے۔ ولے السی تیبر آ تاثر تننگ نا کوشت کننگ ءِ کہ لشکر کشی بروکا وخت ئٹ بناء کننگو۔ دا حکمت عملی نا زریعت ئٹ ریاست نہ بیرہ تینا کاروائی تِہ ڈھکنگ ءِ بلکہ الس ئنا ملی ئٹ تینا دروغ انگا بیانیہ تِہ شاغنگ ءِ کہ بلوچستان ئٹی دائسکان اسِہ ہم بھلو گھام ئس ہرفنگ متنے۔ او بروکاتم ئنا دڑکو ترسا بلوچ آتِہ خلیفنگ نا کوشت ئے کننگ ءِ کہ بلوچ برجاء لشکر کشی نا کاروائی تیٹی ترندی و بیم آ پام تِف۔
پاکستانی ریاست و لشکر کن بلوچستان نا جغرافیائی اہمیت و مڈی تا بے کچ کارمرز و تزویراتی سودا بازی آن بیدس بلوچ قوم ئنا حیثیت بیرہ اسہ نوآبادی و غلام ئسے نا ءِ۔ نن ساندہ پانہ کہ بلوچستان معدنی مڈی تیان سیر ءُ خطرہ یس ءِ ولے دا سیر انگا خطہ تینا بھاتی تِہ اِرا وخت ئنا ورغ و جارات نا زند تننگ کپک انتئے کہ جارات ئٹ زند آجو آ ڈیہ آ خوشحالی تینا مڈی تا تینٹ خواجہ مننگ آن بریک۔ دا کارروائیک بیرہ تزویراتی سیکورٹی، کوزہ ئے سوگو کننگ اسکان افس بلکہ بلوچ قومی مڈی تا لُٹ ئہ پھل ئے برجاء تخنگ نا اسہ ذریعت ئس ءِ۔ دا کارروائی تا پن آ فوج، فوج ئنا شیفکو ادارہ غاک، بڑزکو افسر آک دفاعی بجٹ آن بیدس زیاتی بجٹ و ایلو مراعت آتِہ دوئی کیرہ۔ دا نا ثبوت داد کہ ہرا بڑزکو افسر آک اِرا سال کن بلوچستان ئٹی کاریم کیرہ، اوفتا ذاتی دولت ملٹی بلین ڈالر اسکان سر مریک۔ دا پیسہ غاک بلوچ الس ئنا دتر ئے وہفنگ و مڈی تا لٹ ئہ پھل آن دوئی کننگ مریک۔
ہراتم ہم ریاست پوسکنو و نہاری ءُ کاروائی نا پڑو کیک، تو اوٹی دا اعتراف ڈھکوک مریک کہ بلوچ مزاحمتی تنظیم آک تدوکا اّرا دہک ئٹ گوریلا جنگ ئنا ذریعت ئٹ ریاست ئے چیلنج کرینو۔ دا تنظیم آک بلوچستان نا پہنادی آ جغرافیہ و گھٹ تلاری آ مش تیٹ تینا باہوٹ جاہ و السی مخ تفی ئٹ تینے رکِھسہ فوج آ جلہو کیرہ۔ گوریلا جنگ ئنا حکمتِ عملی و السی مخ تفی اوفتِہ وارخواہی ایتک کہ او پاکستانی لشکر آ جلہو کیر و پدا رکھکوک جاگہ تا واپس کار۔ ہنوکا بیست سال آن جنگی دیہاڑ گواہ ءِ کہ پاکستانی لشکر دا جنگی حکمت نا جواب تننگ کتنے، ہرانا سوب آن تینا بے سوبی تا غصہ ئے لس بلوچ آ کشک و بلوچ راج ئے تحریک آن مُر کننگ و ریاستی نظام ئے قبول کننگ کن اشتماعی سزا تیک۔ دا قشتماعی سزا نا حکمت عملی نا رد ئٹ پاکستانی لشکر بے ڈوہ آ شاری و خوانندہ غا ورنا تِہ ٹک کیک، اوفتِہ زوراکی ئٹ بیگواہ کیک، بے بندغی بیدادی نا گواچی کیک و بیدس عدالت کھسفک۔ دا کُل زوراکیک دا ہیت ئنا ثبوت ءُ کہ ریاستی مشینری تینا بے سوبی تِہ مننگ نا جاگہ غا مظلوم آ الس آ ظلم و ستم ئے تیز کننگ ئٹی آختہ ءِ۔
بلوچستان ئٹی برجاء غا لشکری کاروائی و ریاستی درشانک اسہ چم بازی ئسے نا بشخ ءُ ہرافتا مسخت بلوچ الس ئے اوفتا بنداوی حق آتیان مُر کننگ و اوفتا سرزمین نا مڈی تِہ پُلنگ ءِ۔ دا کاروائیک نہ بیرہ بندغی حق آتا برخلاف ءُ بلکہ جہانی قانود و اصول آتا خلاف ءُ۔ جہان ئے دا راستی مننگ خواہک کہ بلوچستان نا الس تینا حق و آجوئی کن جہد کننگ ءُ، اوفتِہ اوفتا حق خود ارادیت آن پد تخنگ اسہ بھلو نا انصافی ئس ءِ۔
ہندا وخت ءِ کہ بلوچ الس ئنا حق و اونا مزاحمت ئے جہانی تیبر آ منیر و ریاستی زوراکی تا برخلاف توار ہرفنگ مرے۔ ریاستی زوراکی و نفسیاتی چم بازی تیان بلوچ الس ئنا حوصلہ غاک کم مفرور بلکہ آجوئی نا جہد گیشتر محکم مرو۔
جہانی ادارہ غا تیان دا کُل حالیت آ بے واری و غیر فعالیت دا زنک کشی ٹی اواری ءِ۔ دا بے تواری نہ بیرہ بندغی حق آتا خلاف ورزی ءِ بلکہ جہانی ایلم تا اخلاقی و قانودی زمہ واری تیان نرنگ نا بریبر ءِ ہرا بلوچ الس ئنا ویل آتے بھاز کیک۔
او پارے کہ ای جہانی مخلوق ئے پاننگ خواہوہ کہ پاکستان نا بلوچستان ئٹی برجاء غا لشکری کاروائیک و زنک کشی ٹی چین ئنا کڑدار اسہ ناقابل تردید راستی ئس جوڑ مسنے۔ چین تینا سامراجی و توسیع پسندانہ ڈٹ تا رکھینگ کن بلوچستان ئٹی پاکستانی ریاست نا زوراکی نہ تنیا مخ تفی ئے بلکہ مالی و تکنیکی مڈی تا ذریعہ ئٹ دا زوراکی ئے کمک تیک۔ گوادر پورٹ و سی پیک نا وڑ انگا ڈٹ آک دا راستی نا ثبوت ءُ۔ چین ئنا سامراجی ڈٹ آک، خاص سی پیک، بلوچ الس ئنا رضا نا برخلاف اسہ سامراجی و استحصالی ڈٹ ئس ءِ۔ دا ڈٹ تا رد ئٹ بلوچ الس ئے اوفتا زمین تیان کھشنگ ءُ و قدرتی مڈی تیا کوزہ کننگ ءُ ہرانا برخلاف بلوچ الس ہر تیبر آ مزاحمت کننگ ءِ۔ پاکستان دا مزاحمت ئے اسہ نیمہ ئس دیمرئی نا خلاف یا جہانی چم بازی پارسہ جنگی ڈوہداری کننگ ءِ، چین بلوچستان ئٹی اسہ سامراجی و توسیع پسندانہ عزائم تون بلوچ ڈیہہ آ ساڑیءِ۔ دا نہ بیرہ ننا سرزمین، ننا راجی ٹیوار ل و بقاء نا برخلاف صاف ءُ خطرہ سے بلکہ ہند ئٹی توازن نا جنگ ئٹ چین تینا بھلنی خوائک۔ چین پاکستان نا کمک ئٹ ننے آ زمین ئے تنگ کننگ نا کوشست کننگ ءِ۔ نن دا نا برخلاف ہر محاذ آ مزاحمت کرون۔
