بلوچستان لبریشن فرنٹ نا جارکش میجر گہرام بلوچ میڈیا ٹی شنگ کروک تینا درشان ئٹی پارینے کہ 19 نومبر آ کولواہ نا ہند گیشکور ئٹ سرمچارک تنظیمی مشن ئسے آ ہِننگ اسُر کہ مہالو آن سلوک دشمن لشکر اوفتیا جلہو کرے ہرانا سوب آن تنظیم نا اِرا اہم و ہُرے نا سنگت شہید مسُر۔ شہید سرمچار کیپٹن نیاز قادر عرف استاد گمان ہموتم شہید مس، شہید لیفٹننٹ ظریف بلوچ عرف شئے جان بھاز ٹپی مس۔ مشن ئٹ اوار سنگت آک دژمن ئے ورندی تسُر و جنگ ئنا وخت شہد کیپٹن نیاز قادر و اونا سنگت ٹپی شئے جان و اوفتا جنگی مڈی تِہ تینتو اوار ہتنگ ئٹ سرسوب مسر۔
جارکش پارے کہ گڈوپ پاھو نا جہی کیپٹن نیاز قادر ولد قادر بخش 2013 ئٹ تحریک آجوئی ٹی اوار مس و 2014 ئٹ بی ایل ایف نا تلہ غان باقاعدہ بشخ ہلک۔ اَسہ مُرغنو جُہد ئسے نا وخت ئٹ کیپٹن نیاز قادر نا تیبہ خاہوت ئے اشتماعی سزا نا سختی تتون مون تروئی تما۔ ولے او راجی آجوئی نا حوالہ ئٹ تینا موقف آن پدی متو۔ شہید نا بَھلا ایلم شہید لیفٹیننٹ صابر بلوچ عرف تاہیر و کاکا نا مار کیپٹن ظہور بالی تینا تنظیمی سنگت سیکنڈ لیفٹنینٹ ساجد تون اوار و اکبر حمل تون اوار 2022 ئٹ دشمن لشکر نا اَسہ فضائی جلہو ئسیٹ شہید مس۔ اوفتا لُمہ باوہ ئے پاکستانی لشکر کیہی وار زورانسری ئٹ بیگواہی نا گواچی کرے۔ اینو او آئی ڈی پیز نا زند گدریفنگ ءُ۔ کیپٹن نیاز قادر دا وخت ئٹ تنظیم نا سیاسی، عسکری و انٹیلی جنس شعبہ تیٹ اہم خذمت سر تسُنے و دشمن نا اہم پروگرام آتِہ سبوتاژ کننگ ئٹ سرسوب مسُنے۔ او بلوچستان نا بھاز آ ہند آواران، جھاؤ،کولواہ،اورماڑہ، کیلکور و بالگتر نا معرکہ تیٹ بنجائی کڑد ادا کرینے و دشمن آ بسخان تروک جلہو کرینے۔
بی ایل ایف نا جارکش میجر گہرام ودیک پارے کہ کیپٹن نیاز قادر آواران و کولواہ ئٹ براس نا تنظیمی تیبر آ عغدہ تیا مسنے۔ تینا جنگی گشاد و پوسُکنا ٹیکنالوجی تیان پہہ مننگ نا سوب آن او تنظیمی سنگت آ تیٹ اُستاد نا وڑ چاننگ مسکہ، او تنظیم ئٹ قربان یونٹ تون اوار سرمچار آتِہ جنگی و جسمانی فٹنس کن تیار کننگ کن بھاز خواری و مابت ئٹ کاریم ہَلک۔
میجر گہرام پارے کہ گیشکور سنڈوم نا جہی لیفٹیننٹ ظریف بلوچ عرف شئے جان ولد حمل بلوچ 2013 ئٹ تحریک آجوئی ٹی اوار مس و 2014 ئٹ بی ایل ایف نا تلہ غان باقاعدہ بشخ ہلک، دا مُرغنا جہد ئٹ دژمن لشکر نا ظلم و زوراکی و بدترین ظلم و ستم تون مون تس۔ اونا خاہوت نا برخلاف بیدادی ریاستی کاروائی اونا فکر و خیال و عمل ئے نزور کننگ کتو۔ 19 نومبر آ اَسہ تنظیمی مشن ئسے نا وخت آ دژمن لشکر تون جنگ ئٹ بھاز ٹپی مس و اونا تنظیمی سنگتاک اودے رکھوک جاگہ ئسے آ سر کریر۔ اِرا دے اِسکان تنظیم تون تفوک میڈیکل ٹیم اونا جانجوڑی کن تینا کل محدود وسائل آ تِہ کارمرز کرے۔ بدقسمتی آن، او اودے بچفنگ ئٹ بےسوب مسُر۔ تحریک آجوئی ٹی اونا دہ سال ئنا وخت ئٹ درشان کننگ مفروک و استان دننگ مفروک جنگی مہاز آ تیٹ تینا کڑد ادا کرے و بھاز خواری ئٹ تنظیم نا معاشی شعبہ ئٹ خذمت سرانجام تس ہرانا سوب آن ریجنک کونسل اودے عسکری و سیاسی پختگی نا سوب آن لیفٹیننٹ نا عغدہ ئے تس۔ او بھاز اُست ئٹ و دیانت داری ئٹ تنظیمی پروگروم آتِہ اولیت تسس و تینا گڈی ساہ اِسکان اوڑا سلوک اس۔ اونا جُہد آجوئی ٹی تینا قائدانک کڑد ئنا سوب آن مُدام یات تخنگ مرور۔
جارکش ایسر ئٹ پارے کہ بلوچستان لبریشن فرنٹ تینا سنگت سرمچار کیپٹن نیاز قادر عرف استاد گمان و کیفٹیننٹ شہید ظریف بلوچ عرف شئے جان تون اوار بلوچ راجی جُہد ئنا کسر ئٹ شہید مروکا کُل شہید آتِہ دروت ندر کیک و دا عزم ئنا درشانی کیک کہ اوفتا دا بھلا قربانی تیا بلوچستان لبریشن فرنٹ تینا سیاسی و جنگی پروگرام آتِہ ترندی ئٹ برجاء تخو۔ و نن دا عزم کینہ کے بلوچ شہید آتا ہچ وخت اُستان دننگ مفرو بلکن آجو بلوچستان اِسکان جُہد برجاء مرو۔
