بلوچستان نا ضلع مشکے ٹی لشکری کاروائی و بندغی حق آتا لتاڑ تُرندی ئٹ ودینگ ءِ۔ بی وائی سی
بلوچستان نا ہند مشکے آن حوال تا رد ئٹ پاکستانی لشکر نا کُنڈان چُنا و زالبول تیتون اَوار ہندی مخلوق ئے زوراکی ئٹ لشکری کیمپ آ تیٹ توار کننگ ءِ، ہرانگا اوفتے جسمانی و ذہنی اذیت تون مون تروئی تمِک۔
بلوچستان نا ضلع آواران نا ہند مشکے ٹی پاکستانی لشکر ہند آ تیٹ نرینہ غا تِہ زوراکی ئٹ دزگیری کننگ ءُ۔ اوفتے بیدادی نا گواچی کننگ ءُ و بلوچ آجوئی دوست آ تیتون آوار جنگ ئنا وخت اوفتے بندغی اسپر نا وڑ کارمرز کننگ ءُ۔
تُدوکا مَنہ تُدینی تیٹ ہمو خاہوت آتون مسنے ہرافتا بندغ آک 26 اپریل 2024 آن زوراکی ئٹ بیگواہی نا گواچی مسُنو، ہرافتیٹ سجاد اعظم، ولی جان و حاصل خان پنیئو بندغ اوار ءُ ہرافتا خاہوت دا تُدینی تا برخلاف مئی ئٹی مُسہ دے اسکان برانز کریسس۔
زالبول تا رد ئٹ اوفتا بندغ آتے ہند ئٹی ساڑی پاکستانی لشکر کیمپ آ خواہفنگ آن پد زورانسری ئٹ بیگواہ کریسُر، و اوفتا ہچ خبر تمنگ کتو۔
مشکے نا زالبول آک ہرافتیٹ بھازیک دزگیر یا بیگواہ بندغ آتا خاہوت آتان ءُ، بلوچ تنظیم خاص طور ئٹ بلوچ یکجہتی کمیٹی تون تینا حالیت نا ازالہ کننگ و اوفتا آجوئی ئے یخینی کننگ نا خواست کننگ ءُ۔
ہندی تا رد ئٹ دا حالیت کیہی وخت آن برجاء ءِ، ہرانگا نرینہ غاتے وغداری ئٹ پاکستانی لشکر نا کیمپ آ تیٹ دننگ مریک، ہرانگا او بیدادی و زورانسری بیگار برادشت کیرہ داسہ زالبول آتون ہم ہندا عمل مننگ ءِ۔
بلوچ یکجہتی کمیٹی دا حالیت آ بھاز فریشانی نا درشانی کرسا پارے کہ بلوچستان ئٹ بندغی حق آتا لتاڑ و لشکری گھیرہ ہڑدے نا کاریم ئس جوڑ مسنے، ہراٹی زالبول تا بے شرفی و نرینہ غا تیان زوراکی ئٹ کاریم ہلنگ مریک۔
تنظیم تینا درشان ئٹی پارینے کہ دا ظلم آک بلوچ زنک کشی نا اَسہ پین علامت ئسے، ہرافتا مسخت بلوچ اُلس ئے تورِسہ اوفتا حق آتے پھلنگ ءِ۔
بلوچ یکجہتی کمیٹی نا رد ئٹ لشکری کاروائی تا ساڑی حالیت، خاص وڑ ئٹ زالبول تیتون مروکا زیاتی تا برخلاف جہانی برادری و بندغی حق آتا تنظیم آتے ایکشن ہلنگ مرے تاکہ بلوچستان ئٹ بندغی حق آتا لتاڑ نا لڑ توننگ مرے۔
بلوچ یکجہتی کمیٹی دا گام تِہ سخت شیف خلک و زیمی مروک خاہوت آتا زوت آجوئی نا خواست کرے۔
