دلجان بلوچ نا خاہوت و ایلو مخلوق برانز کرسہ کراچی-آواران کسر ئے بند کرے۔
زوراکی ئٹ بیگواہ کننگوک دلجان بلوچ نا آجوئی کن اونا خاہوت و مخلوق نا برانز برجا ءِ، برانز کروکا ڈی سی آواران نا دفتر نا مون آ تولوک برانز کننگ ءُ و آواران-کراچی نا کسر ئے بیدی نا ہند آن بند کرینو۔
برانز کروکا تا پاننگ ءِ کہ او دا بھلّا یخ ئٹی ہم بےآسراتی ئٹ برانز آ تولوک ءُ انتئے کہ ٹینٹی آ دکان تِہ ریاست بیہار تسنے و ننے آسراتی تننگ آن بند کرینے۔ پاکستانی فوج و پولیس اسہ رنگ برانزی تیا زوراکی کننگ ئٹی ءُ کہ نوا دا برانز ئے چھٹفر، ولے برانز ہموتم اسکان برجاء مرو ایتم اسکان کہ دلجان بلوچ یلہ متنے۔
یات مرے کہ دلجان بلوچ ئے دوانزدہ جون 2024 آ پاکستانی فوج آواران آن ہلکنے، اونا بیگواہی آن پد اونا خاہوت 3 اکتوبر 2024 آ ڈی سی نا دفتر نا مون آ چھار دے برانز تسّس۔
خاہوت نا پاننگ ءِ کہ او وخت آ ڈی سی آواران و ایلو ضلعی حاکم آک امنّا کریر کہ دلجان بلوچ ئے دہ دے ئنا تہٹی یلہ کننگو، ولے اینو اسکان ہچّس متنے۔ دروغ ئنا اکرار و ریفنگ نا سوَب آن او ولدا برانز کننگ آ بیوس مسّنو۔
برانز ئٹی، اُلس و اُلاخ والاتان خواست کننگانے کہ او برانز ئٹی بشخ ہلسہ زوراکی نا برخلاف اسٹی و اواری نا درشانی کیر۔ اوفتا پاننگ ءِ کہ اگہ برانزی تہ نسخان ئس مس تو اونا زمہ واری ضلعی انتظامیہ و ساڑی آ حکومت آ مرو۔
دلجان بلوچ نا خاہوت مُستی پارے کہ مہالو برانز ئے چھٹفنگ کن دروغ ئٹ اُست جم کرفنگا، ولے داسا سوبرو اکرار ئسے آن ویتہ برانز ئے برجاء تخون۔ دلجان بلوچ نا آجوئی اوفتا بنیاتی خواست ءِ، ہچّو وڑئسیٹ اوڑان دُو ہفنگوف۔
