دہ سالی آ محمد مصور نا آجوئی کن کوئٹہ ٹی برانز برجاء ءِ۔
کوئٹہ ٹی مُسہ دے آن برمتہ کننگوکا 10 سالہ چنا محمد مصور نا آجوئی کن برانز ئنا سلسلہ برجاء۔ برانزیک پولیس و حکومت آ دوبہ خلکُر کہ او چنا نا رکھ آجوئی ٹی بے سُہب ءُ۔
دو شمبے نا دے کوئٹہ شار ئنا بنجائی چوک ئٹ برانز کننگا ہراڑے برانزیک مُسہ دے مُست برمتہ کننگوکا چُنا نا آجوئی نا خواست کریر، برانزی پولیس و صوبائی حکومت نا برخلاف نعرہ بازی کریر و دوبہ خلکُر کہ کالخواک چنائے آجو کننگ ئٹی بے سُہب مسُنو۔
برمتہ کننگوکا چُنا نا خاہوت تینا بے آرامی نا درشانی کرسا پارے کہ انتظامیہ محمد نا آجوئی کن جوان گامیگیج ہرفتنے۔
خاہوت نا نیمغان دا کوئٹہ ٹی مسلسل مُسٹمیکو دے مروکا برانز اسک، ہراٹی شاری چُنا تا آجوئی کن کسر تیا پیشتمار۔
حوالکار تا رد ئٹ کالخواہ تا نیمغان دائسکان پٹ و پول آ پُوسُکنو حوال شنگ کننگ متنے، برجاء انگا برانز شار ئٹ ٹریفک نا ہِن و بر ئے متاثر کرینے و الس رکھ ئنا حوالہ ئٹ فریشانی ودی مسُنے۔
