بلوچستان نا ہند آواران آن پاکستانی لشکر نا دُو آن زوراکی ئٹ بیگواہی نا گواچی مروکا ورنا دلجان بلوچ نا آجوئی کن اینو دو شمبے نا دے خاہوت نا نیمہ غان برانزی ریلی کشنگ مرو۔
دا سلسلہ ئٹ اینو بلوچ وائس فار جسٹس ریلی نا مُختفی کرسا کُل بندغ دوست سیاسی و چاغڑدی باسک، وکلاء، خوانندہ، صحافی و ایلو شعبہ تیان تعلقداری تخوکہ تیان خواست کرے کہ او برانزی ریلی ٹء تینا اواری ئے یخینی کیر۔
خاہوت دلجان نا آجوئی کن گُڈی حد اسکان ہِننگ نا عزم کرینے۔
اوفتا پاننگ ءِ کہ ننا خواست ءِ دلجان ئے زوت آجو کننگ مرے یا اگہ اوڑا دوبہ ارے تو اودے قانودی وڑ ئٹ عدالت نا مون آ پیش کیر تانکہ نن تینا بندغ تے انصاف تننگ کین۔
یاتی مرے کہ دلجان بلوچ ئے آواران نا ہند تیرتیج آن پاکستانی لشکر 12 جون 2024 آ زورانسری ئٹ بیگواہی نا گواچی کرینے دائسکان اونا ہچ خبر اف۔
دلجان بلوچ نا آجوئی کن خاہوت نا نیمہ غان پر ایمن برانز کننگا و 3 آن 6 اکتوبر اِسکان ڈپٹی کمشنر آواران نا دفتر نا مون آ مُسہ دے اِسکان برانز ہم کننگا۔ برانز نا وخت آ ضلعی افسرآک اسسٹنٹ کمشنر مجیب الرحمن، ضلعی پولی افسر خلیل احمد بگٹی و اورنگزیب بزنجو خاہوت تون مِلار و لکھوک معاہدہ کریر کہ دہ دے ئٹ دلجان آجو کننگ مرو ولے دائسکان دلجان بلوچ آجو مننگ کتنے۔
تُدوکا ہفتہ خاہوت آواران پریس کلب ئٹ اَسہ پریس کانفرنس ئس کرے ہراٹی او بیگواہ دلجان نا آجوئی کن اینو دو شمبے نا دے 18 نومبر آ برانزی ریلی کشگ نا پڑو تسوسُر۔
