وائس فار بلوچ مسنگ پرسنز نا بین ہڑتالی گدان ئے اینو 5639 دن پورو مس، ملیر کراچی آن سیاسی و چاگڑدی جہدکار نوربخش بلوچ، گزین بلوچ و ایلوفک گدان آ بسّر اواری نا درشانی کریر۔
وی بی ایم پی نا وائس چیئرمین ماما قدیر بلوچ تران کرسہ پارے کہ پاکستانی فوج جہی آ غدار، میر و بھلّا بندغاتا کمک ئٹ بلوچ سیاسی راہشون و جہدکاراتہ بیگواہ کرینے۔ اوفتہ بھاز سزا تننگ آن پد اوفتا لاش آتہ خسّنگک، دا وڑئٹ فوجی وسیلہ و سامان تان مچّٹ کاریم ہلّنگک و اڑزان تمک۔ ہندا سوَب آن پاکستانی فوج بھلو لشکرکشی نا جہہ آ ‘ہفّنگ، خلّنگ و بٹنگ’ آن کاریم ہلیک۔
او مونی پارے کہ مکران نا علاقہ بلیدہ، زامران، مند، تمپ بالگتر، ہوشاپ، پسنی، آواران و مشکے ٹی فوج ئنا چھاپہ، لشکرکشی و ہیلی تا بمباری آن بلوچ اُلس ئے شہید و زورئٹ بیگواہ کننگک۔
ماما قدیر بلوچ پارے کہ بلوچستان نا سیاسی آجوئی و انصاف نا جہد ئکن ہزارا بلوچ آک تینا ساہ تہ ندر کرینُہ، ہندن ہزارا بندغاک ریاستی سزا جاہ تیٹ بند ءُ۔ دنیا ئے داسا اسہ پوسکنو نظام ئس بکار اے، ہراڑے حق و انصاف نا نظام ئس مون آ برے۔
