بی ایل ایف نا جارکش میجر گہرام بلوچ میڈیا ٹی شنگ مروکو درشان ئسیٹی پارے کہ 12 نومبر 2024 آ سرمچارآک بالگتر ئٹ تنظیمی مشن ئسے آ اسُر کہ دشمن تون اَسہ جنگ ئسیٹ تنظیم نا سیکنڈ لیفٹنینٹ اعظم عرف قاسم باوہ نا پِن محمد رحیم سکنہ تیرتیج آواران، سیکنڈ لیفٹنینٹ انور عرف ثناہ جان باوہ نا پِن حسین سکنہ رید توک بالگتر، ارب نواز عرف جہانزیب سکنہ گریشہ و زہیر عرف آزاد باوہ نا پِن فضل سکنہ بیرونٹ کیلکور سرزمین نا رکھ ئٹ دشمن تون دلیری ئٹ جنگ کرسا شہید مسُر۔
سیکنڈ لیفٹیننٹ اعظم عرف سنگت قاسم 2013 آن بلوچ راجی آجوئی نا جُہد ئٹ بی ایل ایف نا پلیٹ فارم آن اوار اسک۔ او اَسہ کہنہ مشق گوریلا سرمچار و جفاکش و پوسکُنا جنگی حکمت عملی تا ماہر سنگت ئس اسک۔ او تنظیم ئے فعال و منظم کننگ ٹی اہم کڑد ادا کرینے۔ او جنگی محاذ ئٹ گچک، آواران، کیلکور، کولواہ، بلیدہ، زامران و پین اہم معرکل تیٹ کوزہ گیر لشکر نا برخلاف جنگی معرکہ تیٹ بشخ ہلکُنے۔ اونا محنت و مستقل مزاجی ئے نظر ئٹ ہتیسہ تنظیم اودے کیمپ ئٹ سنگت آتا جنگی تربیت نا زمہ واری تس او دا وخت تنظیم نا سیکنڈ لیفٹنیننٹ نا حیثیت ئٹ تینا زمہ واری تے پورو کننگ اسک۔شہید سنگت ہنوکا سال قربان یونٹ نا بشخ مسس۔
سیکنڈ لیفٹنینٹ انور عرف ثناہ بلوچ 2017 آن راجی آجوئی نا تحریک ئٹ بی ایل ایف تون اوار مسک او تینا محنت، قابلیت و جفاکشی نا سوب آن چُنکو وخت ئسیٹ بھلو مقام ئس دوئی کرے۔ سال 2023 ئٹ او دشمن تون اَسہ جھڑپ ئسیٹ ٹپی مسس اوکان پد نومبر 2023 آ دشمن لشکر اونا خاہوت آن مُسہ زورانسری ئٹ بیگواہ کننگوک بندغ آتے اَسہ دروغ مقابلہ سیٹ شہید کرے۔ ولے او تینا آزاتی نا نظریہ آن پدی متو و شہید جتاء محاذ آتے آ بی ایل ایف نا پلیٹ فارم آن راجی آزادی کن خدمت کرے۔ او اورماڑہ، کولواہ، کیلکور، بلیدہ، زامران، پروم و سی پیک نا اہم معرکہ تیٹ دشمن ئے نسخان تننگ ٹی تینا کڑد ادا کرینے۔ او دا وخت تنظیم نا سیکنڈ لیفٹنینٹ نا حیثیت ئٹ تینا زمہ واری تے جوانیکان پورو کننگ اسک۔
شہید ارب نواز عرف جہانزیب 2021 آن راجی آجوئی نا تحریک ئٹی بی ایل ایف تون اسک۔ او سخت مخلص و جنگجو سرمچار ئس اسک و تنظیم نا ہر کاریم ئٹی مُست اسک۔ او تنظیم نا پلیٹ فارم آن جھاؤ، گریشہ، آواران، کیلکور، مشکے و کولواہ نا کیہی اہم انگا محاذ آتا دشمن ئے بے سہب کننگ ئٹی اہم ءُ کڑدار ادا کرینے و کیہی وار دشمن نا گھیرہ ٹی بسونے ولے تینا سہبمند انگا حکمت عملی و بہادری نا سوب آن پیش تمنگ ئٹی سہبمند مسونے۔
زہیر عرف آزاد 2022 آن بلوچ راجی تحریک ئٹی بی ایل ایف تون اسک۔ او بالگتر،کیلکور، بلیدہ و کیہی ایلو اہم انگا محاذ آتا دشمن نا برخلاف بشخ ہلیسہ دشمن لشکرئے بے سہب کننگ ئٹی بھلو کڑدار ادا کرے۔ او مخلصی، بہادری و جفاکشی تون تینا دے و شام ئے بلوچ راجی تحریک کن قربان کریسس۔ او اسہ سخت دلیر و ذہین ءُ سرمچار ئس اسک۔
بلوچ سرزمین نا آجوئی کن ساہ ئے تروکا کُل شہید آتے خراج عقیدت ندر کینہ، راج ئنا بہادر انگا فرزند آک جام شہادت نوش کرسا آجوئی نا کسرئے نشان تسُر۔
سنگت آتا شہادت ننا حوصلہ تے کم کپسہ بلکہ آجوئی نا مقدس انگا منزل کن شہید آتا دتر نن کن کسرتا چراغءُ۔
بلوچستان لبریشن فرنٹ تینا سرمچار سیکنڈ لیفٹنینٹ شہید اعظم عرف سنگت قاسم، سیکنڈ لیفٹنینٹ شہید انور عرف ثناہ، شہید عرب نواز عرف جہانزیب و شہید زہیر عرف آزاد تون بلوچ راجی جدوجہد نا کسر ئٹ شہید مروکا کُل شہید آتے عظیم انگا قربانی تا خراج تحسین ندر کننگ تون دا عہد کیک کہ شہید آتا قربانی تے ہچ وخت استان دپرون بلکہ آزاد بلوچستان اِسکان جہد مسلسل برجاء مرو۔
