ننا جوان اِنگا بندغ تا قربانیک ننا بقا و زند ئنا سوب ءُ۔ تحریک اکن قربانی تروکا مُدام زندہ مرور۔ امر کہ پاننگ مریک کہ اگہ سقراط زہر کُنتوکا گُڑا کھسککہ ہندون شہیدآک ہم نا گزیر قربانی تا زریعہ ئٹ تاریخ ئٹ تینے نمیران کریر۔
دا خیال آتا درشانی ئے لندن ئٹی بلوچ نیشنل موومنٹ (بی این ایم) نا کُنڈان اڈ تروک یوم بلوچ شہدا نا تقریب ئٹ کریر۔ تقریب ئٹ مورخ ڈاکٹر نصیر دشتی،ورلڈ سندھی کانگریس نا جنرل سیکریٹری ڈاکٹر لکھو لوہانہ، بی این ایم نا جونیئر جوائنٹ سیکریٹری حسن دوست بلوچ، بی این ایم نا فارن ڈیپارٹمنٹ نا ڈپٹی کوارڈینیٹر و سی سی ممبر نیاز بلوچ، بی این ایم یوکے صدر منظور بلوچ، بلوچ ری پبلیکن آرمی ( بی آر پی) یو کے نا صدر منصور بلوچ، بلوچ راجی زرمبش (بی آر زیڈ) نا راہشون عبداللہ سیاھو، بی ایچ آر سی نا جنرل سیکریٹری کمبر مالک بلوچ، بی این ایم یو کے جنرل سیکریٹری کمبر بخشی بلوچ، ڈپٹی جنرل سیکریٹری بی این ایم یوکے جمیل بلوچ و بی این ایم نا دوزواہ ماہ گنج و ایلوک تران کریر۔
بی این ایم یوکے نا نائب صدر نسیم عباس و جاسم میار پروگرام ئنا آرگنائزر اسُر۔
ہموتم شعر پاروکاک ہم تینا کلام پیش کریر و شہیداتے دروت ندر کریر۔ مسلم دیدگ، عبدالرسول بلوچ، ہاتف بلوچ و حفیظ عبداللہ ہم تینا شاعری نا زریعت بلوچ شہیداتے یات کریر۔
پروگرام نا وخت آ ” لال شہید محراب خان “ نا حوالہ ئٹ ڈاکومنٹری فلم نشان تننگا و شرکاء بلوچ شہیداتے دروت ندر کننگ کن شہیداتا عکس آتیا گل پاشی کریر۔
تران کروکاک پاریر کہ بلوچ شہیداتا تاریخ لال شہید مہراب خان نا شہادت 13 نومبر 1839 آن مُست شروع مریک۔ تاریخ ئٹ بلوچ آتا خراب نسل کشی انوشیروان ساسانی کرے و اوکان پد ہم کیہی حکمران آک بلوچ آتا قتل عام کریر۔ ولے علامتی وڑ ئٹ 13 نومبر اَسہ اہم ءُ دے ئسے ہراٹی نن کُل شہیداتے یات کینہ۔اگہ او قربانی تیتوسہ تو بحیثیت راج ننا زندہ مننگ ممکن الوکا۔ اوفتا قربانیک نہ بیرا ننے اُمیت تیرہ بلکن بدترین گڑاک ہرا کس راج ئتون مریرہ او غلامی نا گواچی مریرہ، اونا احساس ترفیرہ۔امیت ترفیرہ کہ ہئو او دے بروئے اَراوخت غلامی نا تارمئی مُر مرو۔
او پاریر کہ ننا شہیداتا قربانی تا سوب آن پاکستان نا ایٹمی ریاست لڑزنگ ءِ و یقین تخبو کہ او دے زوت برو کہ دا ریاست تمو اونا ایسری مرو۔
مقررین آک پاریر کہ ننا کوزہ مروکا سرزمین آ آزاتی نا سُہب ٹک ترو و سُہب ئنا خیسُن آ رنگ ننا شہیداتا دِتر آن بیدس پین جاگہ تیان بفرو۔ ہراڑکن اوفک تینا ساہ ئے ندر کرینو۔
او پاریر کہ دا قربانیک ننا کوپہ تیا زمہ واری شاغیرہ، دافتا شیف آ ہزار آ جواننگا ماک، مسنتا زمہ واری ءِ ہرافک تینا ساہ تے تسُر۔ اوفتا دِتر ضائع مفرو و اینو نا دا دے نن عہد کینہ کہ آزادی، خوشحالی و بقاء کن ننے ہخس قربانی تروئی تَمے جُہد ئے برجاء تخون۔
