وائس فار بلوچ مسنگ پرسنز نا بھلنی ٹی زوراکی ئٹ بیگواہی تا برخلاف اڈ مروکا گدان ئے اینو 5637 دے مس، نیشنل پارٹی نا مُست ئنا مرکزی جنرل سیکریٹری جان محمد بلیدی، علی احمد لانگو، آغا گل و بی ایس او پجار نا چیئرمین بوہیر صالح بلوچ کیمپ آ بریسا اواری نا درشانی کریر۔
ماما قدیر تران کرسہ پارے کہ بلوچستان نا دڑدی آ حالت، دتری آ لاش آک و کوزہ گیر نا بندغی آن پیشن ظلم و تادی و بلوچ زنک ایسری نا داستان ئے نوشتہ کننگ نا وخت آ قلم آن دتر بریک، خنک خڑینک آن پُھر مریرہ، اُست ئنا دھک آک زیات مریرہ، خُلیس بندغ ئے چھارمہ کُنڈ آن پلویڑ کیک، ولے ظالم و ظلم آن نفرت بندغ نا ہنڑز ئے حق ئنا جنگ ئٹی پد بٹک، نفرت راجی فکر ئے کمک کرسہ راج دوستی نا جوزہ ئے پوسکنا کسر تا ہتیک و راجی جہد ئنا توار ئے جہانی مخلوق ئے سر کیک۔
او پارے کہ کوزہ گیر دشمن بلوچ راج ئے نسخان تننگ کن، بلوچ راج ئے مدامی غلام کننگ کن، بلوچ راج ئنا تاریخی دود آتا ایسری کن، وطن آ کوزہ کرسہ بلوچ نا مال و مڈی تان اسلام آباد نا بین ئے ایسر کننگ کن و بلوچ وطن آ تینا واک ئے برجا تخنگ کن بلوچ راج ئنا بھلا راہشون و سرباز آتے جہد ئنا کسر آن مُر کننگ کن لٹ کُٹ و خلّنگ بٹنگ آن کاریم ہلّنگ ءِ۔
ماما قدیر بلوچ نا پاننگ اسک کہ دشمن زوراکی ئٹ راجی جہد ئے شیف کننگ خواہیک تاکہ پین لُٹ ءُ پُل کننگ کے۔ زوراکی ئٹ خُلیفنگ آن راجی جہد ئٹی راستنگا جہدکار و غیرسیاسی بندغ آک بلوچ قیادت آ پھاش مسُر، ہرا راجی جہد ئنا سختی سوری و ایسر آن بےسما اسّہ او زوراکی ئے اسہ وار خننگ تو چُپ مسُر ولے راست انگا جہدکاراک تلار آن بارسوگو سلیسُر۔ اینو ہم بلوچ راج ئنا راستنگا جہدکاراک تلار آن بار سوگو سَلوک ءُ۔
او ایسر ئٹ پارے کہ اینو ہم بلوچ راج ئنا راستنگا راہشون و جہدکار آتا برخلاف گندہ ءُ ہیت کننگک، اوفتے شک ئٹی تخسہ اوفتا جہد و قربانی تا مِش شاغنگ نا کوشست کننگک۔
