شہید خان مہراب خان نا شہیدی آن ہلیس اینو اسکان بلوچ راج ئنا قربانی تا لڑ برجاء ءِ و سرزمین نا آجوئی اسکان برجاء مرو۔ درو ہم جہدکارک شہید مسُر و اِرا دے مُست ہم دا کسر ئٹ جہدکار شہید مریر یا رہشون ہر اسٹ ئس تینا مٹ تینٹ ءِ و کس ئس اونا جاگہ ئے ہلنگ کپک۔
دا ہیت آتِہ بلوچ شہید آتا دے ئنا وختا بی این ایم نا بنجائی فنانس سیکریٹری ناصر بلوچ کرے۔
پروگرام نا بناء شہید آتا یات ئٹ اِرا منٹ ئنا بے تواری و بلوچ راجی ترانہ آن مس۔ ناصر بلوچ تون بی این ایم نا بنجائی کمیٹی نا باسک محمد حنیف بلوچ تران کرے۔
بی این ایم نا بنجائی عغدہ دار ناصر بلوچ پارے کہ آجوئی کبین ءِ ہرا زند آتا قربانی خوائک، داکان آجوئی نا قدر ئنا احساس مریک کہ ہندا سوب آن بندغ آک تینا زند آتا قربانی تیرہ۔ نیمران انگا بلوچ رہشون واجہ غلام محمد ہر وخت پاریکہ کہ کس جہدکار ئس شہید مریک نن اودے دروت ندر کینہ ولے تینکن انتئے ہندا تُغ ئے خنپنہ و ہندا کسر ئے گچین کپنہ۔
اینو نا تحریک ہنوکا تحریک آتیان ہندا سوب آن جتاء ءِ دانا رہشونک باسک آتا دروشم ئٹ قربانی تسُنو و ننے ہندا کسرئے نشان تسُنو۔
ناصر بلوچ پارے کہ دا تحریک نا بنیات ئے تخوکا رہشون شہید غلام محمد، شہید لالا منیر و ایلو سنگت آک شہید مسنو یا زوراکی ئٹ بیگواہ ءُ ولے اینو نا تحریک نا جیڑہ آک کم ءُ انتئے کہ اوفک نن کن کاریم ئے ارزان کرینو۔ ہنوکا وخت اتون جہد ئنا ضرورت آک بدل مریرہ ولے قربانی تا سوب آن اینو ننا تحریک بیست سال آن گیش ءِ کہ ادارتی بنیات آتا برجاء ءِ۔ اینو ننا سیاسی ادارہ غا تیا شہید غلام محمد و اونا سنگت آتا جہد و پام ئنا تھورو ءِ۔
ناصر نا پاننگ اسک کہ دا سرزمین آ ہزار آ سال تیان بلوچ رہینگ ءُ اگہ نن تینے دا سرزمین نا وارث پانہ گڑا ننے تینا زند ئتون اوار کل گڑاک دا زمین آ قربان کروئی ءُ۔
او پارے کہ انگریز ہم بلوچستان آ تیبہ کوزہ کننگ کتو و او اوفتا داکان ہننگ آن پد بلوچستان تینا آجوئی نا پڑوے کرے۔ پدا پاکستان توفک نا زور، منہ غدار سرادر و کالخواہ تا کمک آن بلوچستان آ کوزہ کرے۔ ریاست پاکستان تون ننا ہچو سیالی ئس افک، نئے کہ ننا دود آک اوفتون اسٹ ءُ، نہ زبان ہو سندھ و اوغانستان تون ننا دیہاڑی سیالی ارے ولے پنجاب تون افک نئے دا زوراکی ئٹ کوزہ ئے بلوچ منانے بلکہ اولی دے آن دانا برخلاف جہد کننگ ءِ۔
بی این ایم نا بنجائی باسک جنیف بلوچ پارے کہ ننے دا مجلس ئٹی قول کروئی ءِ کہ نن تینا راجی شہید آتا کسرئے الیپرون اوفتا الوکا کاریم تِہ پورو کرون۔ بلوچ راج ہر وخت جابر آتا برخلاف مزاحمت کرینے، قربانی تسُنے و زوراک آتِہ تینا سرزمین آن کشانے۔ داسا ہم بلوچ مزاحمت نا کسر ئے ہرفینے، قربانی تننگ ءِ و کوزہ گیر پاکستان نا برخلاف جہد کننگ ءِ۔
