بلوچ راہشون ڈاکٹر ماہ رنگ بلوچ پارینے کہ سینزدہ نومبر آ راجی شہیداتہ دروت ندر کیوہ۔ اینو ہمو بھادر آتا دے ءِ ہرافک بلوچ نا گچینا بروکاتم کن تینا ساہ تہ ندر کریر۔ اینو ننا چاگڑد ہمو شہید آتا دتر آن شون ہلنگ ئٹی ءِ۔
او پارینے کہ اگہ نن تینکہ اسہ آسودہ ءُ زندہ او چاگڑد ئس جوڑینگ خواہینہ و بلوچ نا وڑئٹ اسہ شوندارو راج ئس منّنگ خواہینہ تو ننے تینے آن و تینا حلقہ آتان بھازا گڑاتہ چھٹفنگ خواہک۔ اگہ ننے دا ورناتا قربانی و دتر نا احساس ارے تو ننے تین پہ تین نا برخلاف تینا تاغت ئے پھوک کننگ نا جہا تینا مچا تاغت ئے بلوچ نا دشمن نا برخلاف خَلوئی ءِ، تینا ساڑ و کست ئے قربان کروئی ءِ۔
ڈاکٹر ماہ رنگ بلوچ نا پاننگ اس کہ بلوچ راجی شہید آک آسودہ غا بروکاتم ئکن تینا ساہ تہ ندر کرینُہ، اسہ آسودہ ؤ بلوچ چاگڑد ئس کنتون اوار ہر بلوچ نا است ئنا مُراد ءِ۔ جہد، ادب، خواننگ، سائنس، ٹیکنالوجی ہر ہمو شعبہ ہرا راج و چاگڑد نا شون ئٹی کاریم برے۔
اونا پاننگ اس کہ دا وخت آ بلوچ چاگڑد جنگ ئٹی ءِ، بلوچ ورناک تینا شہید آتا دتر و قربانی تہ مون آ تخر و سوچر کہ انت بلوچ نا جہد و بروکاتم کن ننا وخت پھوک کننگک۔ پدا ننے اوفتا بارت ئٹ گیشتر سوچنگ و تینا ساہ تہ ندر کننگ بکار ءِ، انتئے کہ بیرہ ہمدڑدی نا بنداو آ جہد سرسوب مفک۔ ننا چاگڑد نا ہر ورنا ئے سوچوئی ءِ کہ او بلوچ و بلوچستان کن اراڑے و اَرا شعبہ ٹی جہد کننگ کیک، کس جْوانو استاد ئس مننگ کیک، کس سائنسدان ئس مننگ کیک۔ کسس گچینو صحافی ئس، کسس جْوانو زبان چاؤک ئس، ہندن کس پوسکنا ٹیکنالوجی نا چائندار ئس مننگ کیک۔ وخت ئنا بنّنگ آ بلوچ چاگڑد و بلوچ راجی جہد مون/ برور۔ خیالاک راجی و اواری وڑئٹ مرور اگہ نن دا غُٹ ئے تینا جند ئنا فائدہ کن کرون تو دافتان راج و چاگڑد ئے ہچّس رسینگوف۔
ایسر ئٹ او پارے کہ کنا خیال آ بلوچ راجی شہید آتِہ دروت ندر کننگ نا جْواننگا وڑ ہندادے کہ اوفتا گچین کروکا کسر ئٹ کان و راجی جہد ئٹی تینا کڑد ئے سر تین۔
