بلوچ یکجہتی کمیٹی نا جارکش پارے کہ سینزدہ نومبر ئے بلوچ شہید آتا دے ئنا رد ئٹ نن کل شہید آتِہ دروت ندر کینہ۔ بلوچ شہید آتا عظیم قربانیک بلوچ چاگڑد ئٹ چاگڑدی بدلی و شونداری ٹی بنداوی کڑد ادا کرینو، و اینو نا راجی شعور و اسہ وڑ برجاء غا تحریک آ ہموفتا تھورو ءِ۔
او پارے کہ اینو نا دے بلوچ راجی دیہاڑ نا پنّو آ تیٹ دا سوب آن ہم اہم ءِہ کہ بلوچ راہشون و ریاست نا حکمران میر محراب خان انگریز آتا مون آ کاٹم شیف کننگ نا جاگہ غا کاٹم قربان کننگ ءِ اولیت تس۔ اونا دا قربانی سرزمین راج نا رکھ اکن مزاحمت و قربانی نا فلسفہ نا بنداو تخس، و بروکا زنک آک تینا باوہ پیرہ نا جوڑ کروکا فکر و فلسفہ غا عمل کرسا بلوچ چاگڑد ئے فکری غلامی آن رکھوک تخا۔
جارکش پارے کہ اینو نا دے کل ہمو خاہوت و بندغ آتون اواری نا درشانی نا دے ءِ ہراکہ راجی بقا کن تینا ساہ تِہ قربان کرسا راجی مزاحمت و جہد ئے توانائی بشخا، و بلوچ سرزمین ئٹ سامراجیت نا برخلاف توار بڑز کننگ نا دود ئے زندہ تخہ۔
او پارے کہ بلوچ یکجہتی کمیٹی، بلوچ شہید آتا فکر و فلسفہ مزاحمت، انکار و قربانی نا دود آ تیا عمل کرسا دا راجی جہد ئٹ تینا کڑد ء ادا کرسا کرور۔
