بلوچستان نا ضلع واشک ئٹی نا درست آ بندغ آک لیویز چیک پوسٹ آ جلہو کرسا سلاہ و مڈی تِہ تینتو درینو۔ اندن پنجگور کیچ و گنداوہ ٹی پاکستانی لشکر آ جلہو نا حوال ءِ، دکی ٹی تعمیراتی کمپنی ئے ٹک کننگانے۔
شابیتی حوال تا رد ئٹ واشک نا ہند رخشان ئٹ سلاہ بند بندغ آتا بھلو کچ ئس تُدوکا نن لیویز چوکی آ جلہو کرسا لیویز تا سلاہ، موٹر سئیکل تیتون اوار گاڑی تِہ تینتو درینو و چوکی ئے ہُشانو۔
دا وخت جانی نسخان تا حوال رسینگتنے۔
یاتی مرے کہ اِِرا دے مُست ہندا وڑ ئنا تُدینیس ضلع آواران نا ہند گیشکور ئٹ ہم مسس ہرا نا ذمہ واری ئے آجوئی خواہوک سلاہ بند تنظیم بلوچستان لبریشن فرنٹ ہرفیسس، ولے دا جلہو نا ذمہ وار ئے دائسکان کس ہرفتنے۔
ایلو کُنڈ آن ضلع کیچ آن حوال ءِ کہ نا درست آ بندغ آک ہیرونک نا ہند آ پاکستانی لشکر نا چوکی ئے ٹک کرینو۔
پنجگور آن ہم حوال ءِ کہ نا دُرست آ سلاہ بند بندغ آک بنجائی کیمپ ئے ٹک کرینو، ہندی حوالکار تا رد ئٹ ہند ئٹی پنچ تراک نا توار ہم بننگانے۔
دانگدان گنداوہ ئٹ پولیس آ سلاہ بند جلہو نا حوال رسینگانے، دکی آن چمالنگ کن کسر جوڑ کروک کمپنی ئے جالار نا ہند آ سلاہ بند بندغ آک ٹک کرسا مشین تِہ ہُشانو۔
حوالکار آک دعوی کننگ ءُ کہ دا جلہو تیٹ لشکر ئے نسخان تون مون تروئی تمانے واہم کالخواک دا حوالہ ئٹ دائسکان ہچ پاتنو۔ نئے کہ دا جلہو تا زمہ واری ئے کس ہرفینے۔
