بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ سرمچارک آواران، کیچ و مچھ ئٹی کوزہ گیر پاکستانی لشکر و پولیس ئے پنچ جتاؤ جاگہ تیٹی ٹِک کریر۔
او پارے کہ سرمچارک آواران نا علاقہ گیشکور ہور آ یانزدہ نومبر دو شمبے نا دے سئے بجہ غا لیویز چیک پوسٹ آ جلہو کرسا، ساڑی آ مچُ سلاہ تِہ دوئی کریر، لیویز کارندہ غا تِہ بلوچ و بندغی نا خاطر ئٹ خبڑدار کرسا یلہ کریر۔
او ودیک پارے کہ ایلو جلہو ئے یانزدہ نومبر نا نن ہشت بجہ و چھل منٹ آ مچھ شار ئنا پولیس تھانہ غا چغلی بمب خسار۔ دا جلہو پولیس کارندہ غا تِیکن اسِہ خبڑداری ئس اسک کہ اوفک ریاست نا مُخ تفی ئے کپس۔
اونا پاننگ اس کہ سرمچارک کیچ نا علاقہ بالگتر گڈگی آ واٹر سپلائی آ ساڑی پاکستانی لشکر نا چوکی آ یانزدہ نومبر نا نن ہشت بجہ غا پوسکن و بھلا سلاہ تیٹ جلہو کریر، ہراٹی دشمن لشکر ئے جانی و مالی نُسخان مس۔
ترجمان پارے کہ بالگتر ٹی ایلو جلہو ئے چمگ نا ہندا کریر۔ کوزہ گیر لشکر آ بھلا سلاہ تیٹ جلہو کرسا لشکر ئے نُسخان مس۔
اونا پاننگ اس کہ پین اسِہ جلہو ئس سرمچارک دوانزدہ نومبر دو شمبے نا نن 7:30 بجہ غا کیچ ئنا علاقہ گورکوپ آ کوزہ گیر لشکر نا ساڑی آ چوکی آ پوسکن و بھلا سلاہ تیٹ جلہو کریر۔ لشکر ئے جانی و مالی نُسخان مس۔
میجر گہرام بلوچ پارے کہ نن ہندی لشکر لیویز و پولیس ئے خبڑدار کینہ کہ اوفک راجی مزاحمت نا برخلاف کاروائی تیٹی و سرمچار آ تا ہن ئہ بر ئے مانیٹر کپس۔
او پارے کہ بی ایل ایف دا پائک کہ، بی ایل ایف نا مسخت وطن نا آجوئی ئے و آجو وطن نا تغ ئے۔ ہزار آ سرمچارک بلوچ وطن نا رکھ کِن تینا ساہ ئے گوری کننگو۔
او ایسر ئٹ پارے کہ راجی شہید آتا مسخت راجی گچینی دوئی کننگ ءِ۔ دا فلسفہ نا بنداو آ نن خواپنہ کہ ننا دوآن اسِہ بلوچ ئسے نُسخان مرے ولے نن دا پاننگ خواہنہ کہ راجی غداری و ڈوہدار نا سزا مرگ ءِ۔
